Саудия Арабистонининг Ар-Риёд шаҳрида Таэквондо WT бўйича йилнинг энг нуфузли 4 гран-при мусобақасидан бири бўлиб ўтмоқда. Унда фақат олимпиадага киритилган вазн тоифаларда жанглар ўтказилмоқда. Эркаклар ва аёллар 4тадан вазнда баҳсларда иштирок этишмоқда. Ҳар бир вазнда энг кучли 16 нафардан спортчи турнирда қатнашаётган бўлса, юртимиз шарафини 4 нафар таэквондочи Саудияга ташриф буюрган.

Кеча барча вазн тоифаларида саралаш босқичидан бошлаб ярим финалгача бўлган жанглар ўтказилди. Кун якунида 8 вазнда финалга чиққан спортчилар аниқ бўлди.

Токио-2020 олимпиадаси ғолиби Улуғбек Рашитов (68 кг.) 3та жангда ғалаба қозониб, финал йўлланмасини қўлга киритди. Ҳамюртимиз илк босқичда исроиллик Нимрод Кривишскийни, чорак финалда швециялик Али Алианни 2та раундда мағлуб этди. Ярим финалда Улуғбекка Токио-2020 финалидаги рақиби — британиялик Бредли Синделга қарши даянга чиқди. Рашитов жанг давомида устунликка эришди ва 2та бўлимда жанг тақдирини ҳал қилди.

Ҳамюртимиз финалда иорданиялик Зайд Каримга қарши жанг қилади. Финал жанги бугун бўлиб ўтади.

80 кг. вазнда қатнашган маҳоратли таэквондочимиз Никита Рфалович эса дастлабки босқичда испаниялик рақибини 2:1 ҳисобида мағлуб этган бўлса, чорак финалда италиялик Симоне Аллессиога имкониятни бой бериб қўйди (1:2).

Афсуски, мазкур вазнда қатнашган Шуҳрат Салаев мусобақадаги иштирокини эрта якунлади. 0:0 ҳисобида тугаган биринчи ва учинчи раундлар тунислик рақиб фойдасига ёзилди. Салаев эса 2-раундда 7:6 ҳисобида ғалаба қозонди. Гарчи ҳамюртимиз бутун жанг давомида кўпроқ очко қўлга киритган бўлса ҳам ушбу Олимпиада циклидан амалга киритилган янги қоидага кўра тунислик спортчи кейинги даврага йўл олди.

Яқиндагина жаҳон чемпиони унвонини қўлга киритган Светлана Осипова (+67 кг) кутилмаганда илк босқичда имкониятни бой бериб қўйди. Туркиялик Нафия Куш билан жанг қилган ҳамюртимиз 0:2 ҳисобида мағлубиятга учради.