Бугун Косонсойдаги "Марказий" аренамиз мухлислар билан гавжум бўлади. Соат 17:15 дан эътиборан 14-турдан ўрин олган "Навбаҳор"-"Машъал" учрашуви старт олади.

Ушбу баҳсни бежизга аутсайдерлар жанги деб атамадик. Ҳозирги кунда мазкур жамоалар элитада жон сақлаш учун ҳаракат қилишаётгани бор гап. "Машъал"нинг аҳволи "Навбаҳор"никидан бироз ёмонроқ. Лекин муборакликларнинг биргина ғалабаси "Навбаҳор"нинг аҳволини ҳам оғирлаштириши мумкин. Чунки жамоаларнинг орасида тафовут 3 очко, холос.

Бугун ҳар икки жамоани ҳам ғалаба қониқтириши аниқ. Навбатдаги мағлубият якунда қайсидир жамоага жуда қимматга тушиши мумкин. Тўғри, иккинчи давра энди бошланмоқда. Бироқ, бу очколарни улашиш мумкин дегани эмас. Бугун Косонсойдаги ўйингоҳ тўлиб-тошмаслиги аниқ. Ҳаттоки, "водий дерби"ларида ҳам стадион тўлмаган эди. Мухлисларнинг сезиларли равишда камайиб кетишига биргина сабаб: "Навбаҳор"нинг ишончсиз ўйини!

Давралар оралиғидаги трансферлар мухлисларни қониқтирмагани бор гап. Уларнинг фикрича, жамоа ҳеч кимга керак бўлмаган, оғир ҳаракат қиладиган футболчилар билан келишувга эришган. Бу фикрларда қайсидир маънода жон бор. Мисол учун, Риндюк ва Байрамовлар сўнгги вақтларни қандай ўтказишгани бизга қоронғу!

Барибир олдиндан хулоса чиқариш яхши эмас. Бугунги ўйинда футболчиларнинг ҳаракатини кўриб, сўнгра баҳо беришга ҳаракат қиламиз. Шунда кимнинг ҳақлиги маълум бўлади!

Косонсой. 17:15
"Навбаҳор"-"Машъал"
Ҳакамлар: В.Коваленко (Тошкент), Р.Илёсов (Тошкент), М.Саидқосимов (Тошкент), Р.Копадзе (Фарғона).
Назоратчи: А.Абдуллаев (Тошкент).

P.S. Бугунги учрашувни маълум сабабларга кўра онлайн трансляция қила олмаймиз. Бунинг учун Сизлардан узр сўраймиз!