Лондоннинг "Арсенал" клуби Туриннинг "Ювентус" ҳужумчиси Душан Влаховичга бўлган қизиқишни йўқотди.
Журналист Райан Тейлорнинг сўзларига кўра, "канонирлар" сербиялик футболчини январь ойидаги трансфер ойнасида ўз сафига қўшиб олмоқчи эмас.
Манбага кўра, ўтган қишда унинг атрофидагилар клубнинг келишувни амалга оширишга уринишларига эътибор бермагани учун "Арсенал" футболчи билан алоқа қилишни истамаяпти.
Эслатиб ўтамиз, Микель Артета жамоаси жиддий қизиқиш билдирган бўлишига қарамай, Влахович "Фиорентина"дан "Ювентус"га ўтишни танлаган эди.
Жорий мавсумда Влахович Италия чемпионатида 6 та гол урди. "Арсенал" жароҳати туфайли 3 ойни ўтказиб юборадиган ҳужумчиси Габриэль Жезусга ўринбосар қидирмоқда.
