Журналист Фабрицио Романонинг хабар беришича, "Челси" "Мольде"нинг 19 ёшли ҳужумчиси Давид Датро Фофана билан шартнома имзолашга яқин турибди.
Манбага кўра, Лондон клуби ивуарлик ёш футболчи учун 10 миллион евро тўлайди.
Фофананинг "Мольде" билан амалдаги шартномаси 2024 йил охиригача амал қилади. Transfermarkt портали футболчини 7 миллион еврога баҳоламоқда.
Норвегия чемпионатининг жорий мавсумида ҳужумчи 24 та ўйин ўтказиб, 15 та гол урди ва 3 та голли узатмани амалга оширди. Шунингдек, у Конференциялар лигасининг 10 ўйинида тўртта гол ва битта голли узатмага эга.
Премьер-лиганинг жорий мавсумида 14-турдан сўнг “Челси” 21 очко билан турнир жадвалида саккизинчи ўринда бормоқда.
