“Навбаҳор”нинг якунланган мавсумга оид статистик маълумотлари билан таништиришда давом этамиз.

Ўзингизга маълум, “лочинлар” Coca Cola Суперлига – 2022да вице-чемпионликни қўлга киритишди. Маълумки, ғалаба қозонишда голларнинг ўрни беқиёс. Хўш, “Навбаҳор”нинг якунланган мавсумдаги голларига кимлар муаллифлик қилишди?

Хабарингиз бор, Самвел Бабаян шогирдлари Coca Cola Суперлига – 2022да рақиблар дарвозасига 33 та гол уришди. Ушбу голларга эса 11 нафар футболчи муаллифлик қилди.

Жамоанинг тўпурарлар рўйхатини 29 ёшли сербиялик тажрибали ҳужумчи Зоран Марушич  11 та гол билан бошқариб турибди.

Иккинчи ўринда эса 7 та гол билан 29 ёшли тажрибали ярим ҳимоячи Жамшид Искандеров бормоқда. Якунланган мавсумда Искандеров жарима зарбалари ва пенальтилардан ҳам рақиблар дарвозасини ишғол этишга муваффақ бўлганди.   

Кези келганида таъкидлаш жоизки, якунланган мавсумда ҳужумчиларга ёрдамга етиб келган “лочинлар” ҳимоячилари ҳам рақиблар дарвозаларини ишғол этишди.

Жумладан, 26 ёшли марказий ҳимоячи Рустамжон Ашурматов сафарда “Қизилқум” (6-тур, 2:1) ва “Динамо” (8-тур, 1:0) жамоаларига қарши кечган баҳсларда учрашувнинг асосий вақтига ҳакам томонидан қўшиб берилган дақиқаларда боши билан тўпни дарвозага аниқ йўллаб, мазкур ўйинлар тақдирини ҳал қилган, яъни, “Навбаҳор”нинг ютуқларига ўзининг муносиб ҳиссасини қўшганди. Шунингдек, Игорь Голбан ва сербиялик Боян Цигер ҳам ўз ҳисобларига биттадан гол ёзиб қўйишган.     

Мавсум-2022да “Навбаҳор”нинг голларига муаллифлик қилган футболчиларнинг  тўлиқ рўйхати эса қуйидагича кўринишга эга:

1.Зоран Марушич – 11 та
2.Жамшид Искандеров – 7 та
3.Элгужа Григалашвили – 3 та
4.Азимжон Аҳмедов, Рустамжон Ашурматов,Йован Жокич ва Жасур Яхшибоев  – 2 тадан
5.Асадбек Собиржонов, Игорь Голбан, Боян Цигер ва Дониёр Абдуманнопов – 1 тадан.

“Навбаҳор” ПФК матбуот хизмати.