“Navbahor”ning yakunlangan mavsumga oid statistik ma’lumotlari bilan tanishtirishda davom etamiz.

O‘zingizga ma’lum, “lochinlar” Coca Cola Superliga – 2022da vise-chempionlikni qo‘lga kiritishdi. Ma’lumki, g‘alaba qozonishda gollarning o‘rni beqiyos. Xo‘sh, “Navbahor”ning yakunlangan mavsumdagi gollariga kimlar mualliflik qilishdi?

Xabaringiz bor, Samvel Babayan shogirdlari Coca Cola Superliga – 2022da raqiblar darvozasiga 33 ta gol urishdi. Ushbu gollarga esa 11 nafar futbolchi mualliflik qildi.

Jamoaning to‘purarlar ro‘yxatini 29 yoshli serbiyalik tajribali hujumchi Zoran Marushich  11 ta gol bilan boshqarib turibdi.

Ikkinchi o‘rinda esa 7 ta gol bilan 29 yoshli tajribali yarim himoyachi Jamshid Iskanderov bormoqda. Yakunlangan mavsumda Iskanderov jarima zarbalari va penaltilardan ham raqiblar darvozasini ishg‘ol etishga muvaffaq bo‘lgandi.   

Kezi kelganida ta’kidlash joizki, yakunlangan mavsumda hujumchilarga yordamga yetib kelgan “lochinlar” himoyachilari ham raqiblar darvozalarini ishg‘ol etishdi.

Jumladan, 26 yoshli markaziy himoyachi Rustamjon Ashurmatov safarda “Qizilqum” (6-tur, 2:1) va “Dinamo” (8-tur, 1:0) jamoalariga qarshi kechgan bahslarda uchrashuvning asosiy vaqtiga hakam tomonidan qo‘shib berilgan daqiqalarda boshi bilan to‘pni darvozaga aniq yo‘llab, mazkur o‘yinlar taqdirini hal qilgan, ya’ni, “Navbahor”ning yutuqlariga o‘zining munosib hissasini qo‘shgandi. Shuningdek, Igor Golban va serbiyalik Boyan Siger ham o‘z hisoblariga bittadan gol yozib qo‘yishgan.     

Mavsum-2022da “Navbahor”ning gollariga mualliflik qilgan futbolchilarning  to‘liq ro‘yxati esa quyidagicha ko‘rinishga ega:

1.Zoran Marushich – 11 ta
2.Jamshid Iskanderov – 7 ta
3.Elguja Grigalashvili – 3 ta
4.Azimjon Ahmedov, Rustamjon Ashurmatov,Yovan Jokich va Jasur Yaxshiboyev  – 2 tadan
5.Asadbek Sobirjonov, Igor Golban, Boyan Siger va Doniyor Abdumannopov – 1 tadan.

“Navbahor” PFK matbuot xizmati.