Хабарингиз бор, бугун маҳоратли ярим ҳимоячи Аброр Исмоилов "лочинлар" билан икки йиллик шартнома имзолади. Шундан сўнг, футболчи “Навбаҳор” ПФК матбуот хизмати учун қисқача интервью берди. Қуйида мазкур суҳбатни эътиборингизга ҳавола этамиз.
- Аброр, “Навбаҳор”га ўтишингизнинг асосий сабаби нимада?
- Жамоага ўтишимга “Навбаҳор” мураббийлар штабининг максимал қизиқиши ва Осиё Чемпионлар Лигасида ўйнаш имконияти юзага келганлиги сабаб бўлди. “Навбаҳор” бош мураббийи Самвел Вячеславович Бабаян менга бир неча бор қўнғироқ қилди ва мени узоқ вақтдан бери кузатиб келаётганини айтди. Самвел Вячеславович “Навбаҳор”да мен футболчи сифатида ўсиб, янада олдинга қадам ташлаб, яна Ўзбекистон терма жамоаси таркибига қайтишим ва Осиё Чемпионлар Лигасида ўйнашим мумкинлигини таъкидлади. Бу эса юртимиздаги ҳар қандай футболчининг асосий орзуси.
Шунинг учун мен ”Навбаҳор”ни танладим ва бундан афсусланмайман. Афсуски, “Нефтчи” мураббийидан менга ҳеч қандай қўнғироқ бўлмади. Менимча, у менга ишонмади, ўйин услубимга тушмайди, дея, ўйлади, шекилли. Албатта, бу ачинарли. Чунки Фарғона менинг она шаҳрим.
Гарчи “Нефтчи”дан кетсамда, жамоа мухлислари, жамоадошларим ва Фарғона шаҳар раҳбариятининг илиқ муносабатини доимо миннатдорчилик билан эслайман.
