"Нефтчи" жамоаси сафида тўп тепган Аброр Исмоилов янги мавсумни Наманганнинг "Навбахор" жамоаси бошлайди, Исмоилов янги клуби билан икки йиллик шартнома имзолади, шу фурсатдан фойдаланиб Аброр Исмоиловдан қисқа фикр мулоҳазалари билан ўртоқлашиши сўрадик ва ушбу интерьюни тақдим этамиз.
—Ушбу мавсум якунлари бўйича фикрларингиз?
—Бу йилги мавсумда “Нефтчи” жамоаси Суперлигада бир-бирига ўхшамаган икки даврани ўтказди деб ўйлайман. Биринчи даврадаги омадсизликлардан сўнг жамоа анча тушкунликка тушиб қолган эди, бироқ иккинчи даврадаги ўзгаришлар жамоага жуда катта ёрдам берди ва “Нефтчи” Суперлигада қолиш вазифасини уддалай олди. Про лигадан чиққан клуб элитада жон сақлаб қолиши бу табиий ҳол деб ўйлайман.
—Кеча “Навбаҳор” футбол клуби сизни футболчиси сифатида расман эълон қилди. “Навбаҳор”га ўтиш қандай юз берди?
—Жорий мавсум якунлангач “Нефтчи” билан шартномам якунига етган эди. Суперлиганинг бир қатор жамоаларидан таклифлар тушди. Жумладан, “Навбаҳор” футбол клубидан ҳам таклиф бўлди. Тўғрисини айтсам, “Нефтчи”да қолиш нияти йўқ эмасди. Лекин, “Навбаҳор” жамоаси келаси йили ОЧЛда ўйнайди. Клуб ҳозирги кунда мусобақа етакчиларидан бўлиб тургани боис, ушбу жамоадаги ўйинларим орқали терма жамоа эшикларини қайта очиш имконияти пайдо бўлишини ҳисобга олдим ва “Навбаҳор” клуби билан шартнома имзоладим.
—“Навбаҳор” жамоаси билан шартнома имзолаганингиздан сўнг клуб сайтига интервью бердингиз. Унда “Нефтчи” клубидан сизга ҳеч ким алоқага чиқмагани ва бош мураббий сизга ишонмагани ҳақида гапиргансиз. Мазкур ҳолатга изоҳ берсангиз?
—Яхши савол бердингиз. Интерьвюмдаги ўша жумла озгина нотўғри талқин қилинган кўринади, мен мураббий телефон қилмагани ёки менга ишонишмади демагандим, клубдаги барча футболчилар қатори мени ҳам 12 декабрдаги Тошкент шаҳридаги ўқув-йиғин машғулотларига таклиф қилишди. Лекин, оилавий сабаблар билан Москвада бўлиб турганим боис 12 декабрь куни машғулотларга бора олмадим. Москвадан келгач эса “Навбаҳор” жамоасидан таклиф келиб тушди. Виталий Левченко олдиларига бордим ва вазиятни тушунтирдим. Виталий Григоревич мени тўғри тушунди ва келажакдаги фаолиятимга омад тилади. Шундан сўнг клубдагилар билан дўстона хайрлашдик.
Шу ўринда қўшимча қилиб ўтишим керак, Суперлиганинг иккинчи даврасида “Нефтчи” жамоаси бош мураббийига айланган Виталий Григоревичдан қисқа муддат ичида кўп нарса ўргандим. Мураббий сифатида ҳам, инсонийлик фазилати борасида ҳам менга жуда ёқди. Қисқа қилиб айтганда, Виталий Григоревич ўз касбининг эгаси. Шу ўринда, “Нефтчи”нинг шонли ўтмишини қайтаришда, вилоят футболини ривожлантиришда ва мухлисларни футболдан қувонтириб келаётганликлари учун вилоят ҳокими Ҳайрулло Ҳаитбаевич Бозоровга,катта раҳмат айтаман, бундан футболга мехр берган вилоят рахбарини кўрмаган эдим, лекин албатта келажакда “Нефти”га қайтишни сўрашса албатта қайтаман!
—Ижтимоий тармоқларда Россия клубларидан ҳам таклиф бўлгани айтилди. Шу ростми?
—Россия ва бошқа давлатлардан аниқ таклифлар бўлди лекин музокоралар якунланмай қолди.
- Мавсум давомида сизга энг ёққан учрашув қайси бўлди?
- Яйпанда иккинчи даврадаги “Қизилқум” жамоасига қарши кечкан учрашув бўлди деб бемалол айта оламан шу учрашувда аввалига гол ўтказиб юбордик шундан кейин пеналти тепиш хуқуқини қўлга киритдик лекин пеналтидан гол кирита олмадим, ўйин сўнгига қадар икки гол уриб айбимни ҳам ювдим ва жамоамиз ғалаба қозонди.
-Жамоамиз муҳлислари учун тилакларингиз?
- Таъкидлаб ўтмоқчиман, “Нефтчи”ни яхши кўраман. Клуб мени футболчи қилиб етиштириб берди. Бу учун барча мураббийларимга раҳмат айтаман. Мухлислар танлаган йўлимни албатта негатив ўйлашлари табиий ҳол, сабаби, Аброр Исмоилов фарғоналик футболчи, лекин бу футбол. Мухлислар мени тўғри тушунишларини сўраган бўлар эдим.
Профессионал сифатида футболчилар клубдан клубга ўтишлари оддий ҳол. Янги мавсумда “Нефтчи” жамоасига омад тилайман. “Нефтчи” ҳали ўз сўзини айтади ва клуб чемпион бўлишига тилакдошман ! Олға, "Нефтчи"!
— Сизга ҳам келажакдаги фаолиятингизда омад ёр бўлишини тилаб қоламиз!
