Мамлакат чемпионатининг навбатдаги турида “Навбаҳор” “Андижон” меҳмони бўлади. 10 август куни “Соғлом Авлод” ўйингоҳида ўтадиган баҳсда мухлисларни қизиқарли учрашувга гувоҳ бўлишларига шубҳа йўқ.
Андижондаги учрашувни навоийлик ҳакамлар бригадаси бошқариб боради. Рустам Бобомуродов зиммасига бош ҳакамлик вазифаси юклатилган бўлса, унга қанотларда Обид Жумаев ва Руслан Самандаровлар ёрдам беришади. Захирадаги ҳакам сифатида фарғоналик Рустам Толибжонов қайд этилган. Сардор Нажафалиев Андижонга назоратчи сифатида ташриф буюради.
Айни пайтда "Навбаҳор" футболчилари навбатдаги водий "дерби"сига катта иштиёқ билан тайёргарлик кўришмоқда. Йигитларнинг барчаларининг кайфиятини кўтаринки руҳда эканлигини ҳам айтиш жоиз. Оилавий сабаб туфайли ўз юртига жўнаб кетган жамоа катта мураббийи Александр Клименко яна Наманганга қайтиб келганлиги ҳам эътиборга молик.
"Навбаҳор" ва "Андижон" жамоалари шу кунга қадар 39 бор ўзаро майдонга тушишган. Бўлиб ўтган учрашувларнинг 20 тасида "Навбаҳор" ғалабани тантана қилган. Ўн икки бор дуранг қайд этилган бўлса, етти ўйинда "Андижон" уч очкони қўлга киритган. Тўплар нисбатидаги кўрсаткич эса 61-39, "Навбаҳор" фойдасига.
Жамоаларнинг биринчи даврада Косонсойда ўтган ўзаро ўйинида “Навбаҳор” Алишер Маҳмудовнинг киритган ягона голи туфайли ғалабани қўлга киритганди. Ўша учрашувда Маҳмудов пенальтини аниқ амалга ошира олмаганлигини ҳам қўшимча қилиш мумкин.
