"Ливерпуль" бош мураббийи Юрген Клопп жорий мавсум якунида АПЛда кучли тўртликка кириш учун кураш ҳақида ўз фикри билан ўртоқлашди.
"Бу мавсумда биз кучли 7 талик ҳақида гапиряпмиз. Энди ҳаммамиз биламизки, "Ньюкасл" жуда кучли даъвогар. Чемпионлар лигасига фақат тўртта жамоа йўлланма олади. Ҳозир икки ўрин қолганга ўхшайди - "Арсенал" ажойиб мавсумни ўтказмоқда.
Чемпионлар лигасига йўл олишимиз учун мавсумнинг иккинчи ярмини ажойиб ўтказишимиз керак. Бу бизнинг мақсадимиз. Бизда қандай сифатли рақобатчилар борлиги аниқ, лекин кўп нарса барибир ўзимизга боғлиқ. Бошқа жамоалар каби босим остидамиз, чунки бир неча очко ортда қолганимизни билиш ёқимли туйғу эмас. Бизни кўплаб ажойиб ўйинлар билан ажойиб жанглар кутмоқда", - дея Клоппнинг сўзларини келтиради Daily Mail.
"Арсенал" жорий мавсумда 40 очко билан АПЛда пешқадамлик қилмоқда. "Ман Сити" 35 очко билан иккинчи ўринда бормоқда. Кучли учликни 33 очко билан “Ньюкасл” якунлаб турибди. Тўртинчи ва бешинчи ўринларда "Тоттенхэм" (30) ва "МЮ" (29) жой олган. "Ливерпуль" 25 очко билан олтинчи ўринда бормоқда.
