Каноэда эшкак эшиш бўйича 200 метр масофага ярим финалда иштирок этган Вадим Меньков финал босқичига чиқа олмади. Бунга нима сабаб бўлди?

Албатта Вадимнинг асосий ютуқлари 500 ва 1000 метр масофаларга қўлга киритилган. Шу боисдан 200 метрлик масофада унинг финалга чиқа олмагани унчалик шов-шувли бўлмаслиги мумкин бироқ ушбу мусобақаларда ғалабаларнинг анъанага айланмаганига бирор сабаб бўлиши табиий. Бугунги ярим финалда ТВ қаршисидан кузатган бўлсангиз Вадим стартга бироз кечроқ чиқди.

Ушбу натижалар якунлангач Вадимнинг стартдаги тезлигини аниқлаштирдик. Маълум бўлишича, Вадимнинг старт чизиғини тарк этиш тезлиги 2.37 сонияни ташкил қилган. Қайсидир маънода буни ўзига хос антирекорд дейиш мумкин. Солиштириш учун унинг гуруҳидан Вадимдан кейин кеч старт чизиғини босиб ўтган спортчининг натижаси 0.91 сонияга тенг экан. Гуруҳ етакчиси эса 0.411 сонияни қайд этган. Энди тасаввур қилинг. Агар Вадим ҳеч бўлмаса худди 0.91 тезликни намойиш этганда (эътибор беринг бу энг минимал кўрсаткич ҳисоб-китоби) камида 1.46 сония вақтдан ютган ва маррага 41.531 сонияда етиб келган ва финалга (финал учун йўлланманинг сўнгги соҳиби 41.771 натижа қайд этган) йўл олган бўларди.

Афсуски Меньковга доим панд бериб келган бу тезлик яна бир маротаба ўз кучини кўрсатди ва у энди фақатгина 9-16 ўринлар учун кураша олиши мумкин холос.