Хабарингиз бор, айни пайтда Ўзбекистон Coca Cola Суперлигасида мавсумлар оралиғидаги танаффус ва қишки трансфер “ойнаси” пайти.

Шу боис, Суперлиганинг барча клубларида ўзгаришлар бўлиши табиий. Мазкур ўзгаришлар албатта, “Навбаҳор”га ҳам тегишли.

Олдинроқ “лочинлар”нинг сербиялик 29 ёшли ҳужумчиси Зоран Марушич жамоамизни тарк этганлигини маълум қилгандик.

Шунингдек, жамоанинг яна бир қатор футболчилари янги мавсумни бошқа клубларда давом эттиришга қарор қилишди. Қуйида шу ҳақда тўхталамиз.

“Навбаҳор” таркибини дарвозабон Раҳимжон Давронов (жамоа таркибидан 2021-2022 йиллар мавсумларида ўрин олиб, Ўзбекистон Coca Cola кубоги баҳсида жамоамиз дарвозасини қўриқлаган), ҳимоячилар - Рустам Ашурматов (жамоа сафида Coca Cola Суперлига - 2022да 25 та ўйин, 2250 дақиқа, 2 та гол, 1 та ассист), Боян Цигер (жамоа сафида 2021 – 2022 йиллар мавсумларида Cуперлигада жами 36 та ўйинда майдонга тушиб, 3095 дақиқа тўп тепиб, 1 та голга муаллифлик қилган), Станислав Андреев (Суперлига-2022да 19 та ўйин, 1379 дақиқа, 1 та ассист), ярим ҳимоячилар – Азимжон Аҳмедов (2019 – 2022 йиллар мавсумида жамоа таркибида Суперлигада 88 та ўйинда майдонга тушиб, 6402 дақиқа тўп тепиб, 9 та гол урган ва 1 та голга ассистентлик қилган), Нурилло Тўхтасинов (Суперлига–2022да 13 та ўйин, 508 дақиқа, 1 та ассист), Диёржон Туропов (жамоа таркибида Суперлига–2022да 12 та ўйин, 759 дақиқа, 1 та ассист), қирғизистонлик 32 ёшли ҳужумчи Мирлан Мурзаев (“лочинлар” таркибида Суперлига–2022да 3 та ўйин 52 дақиқа), бундан ташқари, жамоада ижара асосида тўп тепган россиялик 33 ёшли ҳужумчи Александр Касьян (“лочинлар” таркибида Суперлига–2022да 6 та ўйин, 33 дақиқа) тарк этишди.

Мазкур ўйинчилардан Рустамжон Ашурматов, Боян Цигер ва Мирлан Мурзаев ўз фаолиятларини хориж клублари, қолганлари эса юртимиз жамоаларида давом эттиришади.

“Навбаҳор” ПФК матбуот хизмати.