Ян Зоммер фаолиятини "Бавария"да давом эттирмоқчи.
Испания, Англия ва Италия жамоалари қизиқиш билдираётганига қарамай, дарвозабон Мюнхен клубига ўтмоқчи. У аллақачон муносабатлари жуда яхши бўлган "Боруссия Гладбах" раҳбарларини бу ҳақида хабардор қилган.
Зоммер мавсумнинг иккинчи қисмида "Бавария"нинг асосий дарвозабони бўлишни ва клуб билан Бундеслига, Германия кубоги ва Чемпионлар лигасида ғалаба қозонишни истайди.
Мануэль Нойер жароҳатидан фориғ бўлгач, Зоммер у билан бошланғич ўрин учун рақобатлашмоқчи ва “Бавария”нинг биринчи рақамли дарвозабони бўлмоқчи. Ян 36 ёшли дарвозабонни ҳурмат қилади, лекин у билан рақобат қилишдан қўрқмайди.
Ҳасан Салиҳамиджич кеча "Бавария" Зоммерга қизиқаётганини тасдиқлади. Маълум бўлишича, дарвозабон трансфер борасида мюнхенликлар билан оғзаки келишиб олган. Улар футболчи билан 2025 йилгача шартнома имзолашлари мумкин.
