"Ливерпуль" ушбу трансфер ойнасида ярим ҳимоя чизиғини кучайтирмоқчи. La Gazette Dello Sport хабарига кўра, мерсисайдликлар "Аталанта"га ҳужумкор ярим ҳимоячи Тён Копмейнерсни сотиб олиш бўйича таклиф билан чиқишган.
Манбага кўра, итальян клуби футболчи билан 40 миллион евродан кам пулга хайрлашишни режалаштирмаяпти. "Ливерпуль" футболчи учун қанча маблағ кетишидан хабардор ва раҳбарият бу шартларга розими ёки йўқми ҳозирча аниқланмаган. Бундан ташқари, британияликлар Марокаш терма жамоаси таркибида Қатардаги жаҳон чемпионатида ўзини кўрсатган “Фиорентина” ярим ҳимоячиси Софьян Амрабатга ҳам даъвогарлик қилмоқда.
Италия А сериясининг жорий мавсумида Копмейнерс “Аталанта” сафида 16 та ўйин ўтказиб, 4 та гол урди ва 3 та голли узатмани амалга оширди. Футболчи Нидерландия терма жамоаси сафида жаҳон чемпионатида ўйнади ва бешта учрашувда биттадан голли узатма берди.
