Испания чемпионатининг 16-тури доирасида «Реал» сафарда «Вильярреал» клуби меҳмони бўлиб, жуда оғир ўйин ўтказди.

Биринчи бўлимда тўп назорати ва вазиятлар яратиш бўйича устунлик "Сариқ сувости кемаси" томонида бўлди. Кике Сетьен шогирдлари улардан фойдалана олишмади.

Иккинчи бўлимнинг дебюти эса мезбонлар учун омадли келди. Йереми Пинонинг зарбасидан кейин тўп Мендига тегиб, тўрга бориб тушди.

Орадан тахминан 10 дақиқа ўтиб ҳакам ВАР ёрдамида "Вильярреал" дарвозасига пенальти белгилади. Тўп ҳимоячининг қўлига тегиб кетганди. Пенальтини Бензема аниқ амалга ошириб, ҳисобни тенглаштирди.

Орадан атиги 1 дақиқа ўтиб, бу сафар меҳмонлар дарвозаси томон пенальти қўйилди. Менди тўпни узатишда хатога йўл қўйгани учун "Вильярреал" тўпни эгаллаб олиб, "Мадрид" жарима майдонига кираётганида тўп Алабанинг қўлига тегди. Жерар Морено аниқ зарба билан Куртуани доғда қолдирди.

Анчелотти бир нечта ўзгаришлар қилиб, вазиятни ўнглашга ҳаракат қилди. Мадридликлар хавфли вазиятлар яратишди, аммо улардан фойдаланишда омад етишмади. Шунингдек, майдон эгалари қарши ҳужумларда бир нечта вазиятларга эга бўшлишди, бироқ улар ҳам имкониятларни кўкка совуришди.

Энг сўнгги дақиқада эса "Реал" бурчак зарбасини амалга оширгани учун Тибо Куртуа рақиб жарима майдонига етиб келди. Аммо тўпни "Вильярреал" футболчилари эгаллаб, ҳужумга ўтиб кетишди. Данжума эса 40 метрлардан бўш дарвозани ишғол эта олмади. Тўп устун ёнидан ўтиб кетди.

Шу тариқа, "Вильярреал" муҳим ғалабани қўлга киритди ва ўз очколарини 30тага етказиб, 3-ўринга кўтарилиб олди. "Реал" эса муҳим 3 очкодан маҳрум бўлди.

Испания Ла лигаси, 16-тур
Вильярреал – Реал Мадрид 2:1 (0:0, 2:1)
Голлар: 1:0 – 47 Пино, 1:1 – 60, пенальти Бензема, 2:1 – 63, пенальти Жерар Морено.
Вильярреал – Рейна, Фойт, Альбиоль, Пау Торрес, Альберто Морено (Педраса, 72), Коклен (Тригерос, 89), Парехо, Алекс Баэна, Чуквуэзе, Пино (Моралес, 81), Жерар Морено (Данджума, 89).
Реал Мадрид – Куртуа, Милитао, Алаба, Рюдигер, Менди (Родриго, 64), Модрич (Камавинга, 70), Кроос, Тчуамени (Васкес, 64), Вальверде (Асенсио, 82), Бензема, Винисиус Жуниор.
Огоҳлантиришлар: Пау Торрес (16), Альбиоль (75), Алекс Баэна (90), Рейна (90), Камавинга (90).