"Бавария" Мёнхенгладбахнинг "Боруссия" клуби дарвозабони Ян Зоммернинг трансферини амалга оширишга ҳаракат қилмоқда, деб хабар беради Sport1.de.
Манбага кўра, "Бавария" дарвозабоннинг трансфери учун сал кам беш миллион евро таклиф қилган. Қайд этилишича, “Боруссия” дарвозабон учун камида саккиз миллион евро олишни режалаштирган. Бу маблағ Мёнхенгладбах клубига "Монпелье"дан Йонас Омлинни трансфер қилиши учун етарли бўлиши керак. Қайд этилишича, “Бавария” ҳали бундай нархни таклиф қилишга тайёр эмас.
Sky Sports Deustchland журналисти Флориан Плеттенбергнинг фикрича, Зоммер "Бавария" учун асосий вариант бўлиб қолмоқда.
Қайд этилишича, Зоммер аллақачон “Боруссия” вице-президенти Райнер Бонхоф билан боғланиб, қишда “Бавария”га ўтмоқчи эканлигини айтган.
34 ёшли дарвозабон 2014 йилнинг июлидан бери "Боруссия М" таркибида тўп сурмоқда. Жорий мавсумда у Мёнхенгладбах клуби сафида 11 та ўйин ўтказиб, 14 та гол ўтказиб юборди ва 4 марта ўз дарвозаси дахлсизлигини сақлаб қолди. Унинг шартномаси 2023 йилгача мўлжалланган.
