Кристоф Галтье Лига 1да "Ренн"дан учралган мағлубиятдан сўнг (0:1) "ПСЖ"нинг ўйинини танқид қилди.
"ПСЖ" Лига 1да сўнгги 3 учрашувнинг 2 тасида мағлуб бўлди. "Ренн" билан ўйинда Галтье шогирдлари рақиб дарвозасига битта зарба йўллади.
"Бизнинг ўйинимиз айниқса мени хафа қилди. Биз ҳеч қандай имконият яратмадик. Қулай вазиятлар жуда кам эди. Биз бор эътиборимизни тўпга эгалик қилишга қаратдик. "Ренн"нинг ҳимоя чизиғига босим ўтказадиган футболчилар етишмади.
Улар бизга қарши ҳужум қилишни хоҳлашларини билардик. Шу сабабли мен учта марказий ҳимоячидан иборат схемани танладим, аммо бундай тактика билан ҳужум чизиғи анча самарали бўлиши керак эди", - деди ПСЖ устози.
Эндиликда "ПСЖ" Лига 1 турнир жадвалида "Ланс"ни 3 очкога ортда қолдириб, пешқадамлик қилмоқда. Кейинги турда парижликлар ўз майдонида "Реймс" билан ўйнайди.
