Ўзбекистон миллий терма жамоаси Иорданияга қарши иккинчи ўйинда мағлубиятга учради. 2 кун олдинги жамоамиз ўзининг иккинчи таркиби билан рақибни 1:0 ҳисобида мағлуб этган бўлса, асосий таркиб билан бу ишни амалга ошира олмади.

Биринчи ўйиндаги мағлубиятдан хулоса чиқарган иорданияликлар ўз ююртдошлари кўз олдида (шунингдек, бу ҳасни Иордания Қироллиги раҳбарлари ҳам кузатиб боришди) бутунлай бошқача ҳаракат қилишди. Биринчи ўйиндаги ҳисоб учун ўзларини оқлаб олиш учун катта ҳажмдаги ишни амалга оширишди.

Биринчи бўлимда ҳисоб очилмади. Иккинчи бўлимда марказий ҳимоячиларимизнинг эътиборсизлиги туфайли тўп дарвозамиздан ўрин олди. Ўнг қанотдан юқори тезликда етказиб берилган тўпни ҳужумчи дарвозага жойлаб қўйди. Орадан кўп ўтмасдан Акбар Исматуллаев жарима майдончамиз ичида ҳужумчини қўполлик билан йиқитди ва ҳақли равишда дарвозамиз томон пенальти белгиланди. Абдул Фаттоҳ жарима зарбасидан адашмади — 2:0.

Ўтказиб юборилган голдан кейин вакилларимиз тезликни оширишга муваффақ бўлишди. Аммо дарвозабон Амир Шафини доғда қолдириш йигитларга насиб этмади. Вазиятлар етарли бўлди, аммо улардан фойдаланиш бўйича яна оқсаш кўзга ташланди.

Ўртоқлик учрашуви.
ИОРДАНИЯ - ЎЗБЕКИСТОН - 2:0 (0:0
Голлар: Аҳмад Хайел (56), Ҳасан Абдул Фаттоҳ (70-пен.)
Иордания: Амир Шафи, Муҳаммад Мустафо, Анас Бани Ёсин, Мҳаммад Дмейрри, Сулаймон Салмон (Илах ал-Ҳанаҳна), Шоди Аба Ҳашҳаш, Аҳмад Самир (Саид Морган), Ленс Ҳожи (Удай), Халил Бани Аттия (Ҳасан Абдул Фаттоҳ), Абдулла Дийб, Маҳмуд Заътара (Аҳмад Хали)
Ўзбекистон: Игнатий Нестеров, Олег Зотеев, Акбар Исматуллаев (Фозил Мусаев), Ислом Тўхтахўжаев, Сервер Жепаров, Санжар Турсунов, Темур Кападзе, Станислав Андреев (Дилшод Раҳматуллаев), Марат Бикмаев (Шоҳруҳ Гадоев), Иван Нагаев