«Локомотив» таркибига яқиндагина келиб қўшилган Боян Найденов ўзининг илк таассуротлари билан ўртоқлашди.

— Дастлабки таассуротлар ажойиб. Мўъжазгина стадион, клуб инфратузилмаси, умуман барчаси ажойиб. Нафақат «Локомотив», балки, Тошкентнинг барча клублари жуда тартибли ишлашади.

— «Локомотив» Про-лигада иштирок этади. Клуб жамоага бир йилнинг ўзида Суперлигага қайтиш вазифасини қўйган. Бу ҳақида нима дейсиз?
— Ҳолатни яхши тушуниб турибман. Умид қиламанки, вазифани аъло даражада бажарамиз. Чунки «Локомотив»нинг жойи Про-лигада эмас. Клубни Суперлигага қайтариш шарт!

— Бу ерга келгунингизча клуб ҳақида нималарни эшитдингиз?
— Ўзбекистонда ўйнаганим учун кўп нарсаларни биламан. «Локомотив» — катта ном, катта клуб. Бундай раҳбарият, жамоадошлар билан клуб аслида Суперлигада бўлиши керак. Ҳали барчаси ўз ўрнига тушиб кетади.