"Пахтакор" кеча Туркиядаги йиғини доирасида Украинанинг "Днепр" жамоасига қарши ўртоқлик учрашувини ўтказиб, йирик ҳисобда имкониятни бой берди. Тошкентликлар устози Максим Шацких ўйиндан кейин ўз фикрлари билан ўртоқлашди.

«Бу шунчаки йиғин... Бундан ташқари, "Днепр-1" ва биз мазкур ўйинга турли ҳолатда келдик. Рақиб деярли битта таркиб билан ўйнаган бўлса, бизнинг бирданига 6 футболчимиз сафдан чиқди. Шунинг учун аралаш таркиб билан ўйнашга тўғри келди. Масалан, бизнинг номинал ҳужумчимиз ўнг қанот ҳимоячиси вазифасини бажарди.

Шунингдек, биз асосий таркибда ёшларни жалб қиляпмиз. Улар тажриба тўплашини ва тезроқ ўйин фалсафамизни тушуниб олишларини истаймиз.

Шунинг учун бу баҳсдан хулоса чиқариш қийин. Агар асосий таркиб билан расмий учрашувда ўйнаганимизда — бошқа гап эди. Албатта, "Днепр-1" яхши шаклланган жамоа экани кўриниб турибди. Аммо биз ҳам ўз даражамизни ва қандай ўйнашни биламиз. Қисқа қилиб айтганда, мазкур ўйиндан бирор бир хулоса қилиш қийин. Бу шунчаки назорат ўйини эди.

Боз устига, "Днепр-1"нинг ҳозирги ҳолати бошқача жамоа. Жамоа бир ойдан кейин Конференциялар лигаси ўйинида иштирок этади. Бизда эса янги мавсум 3 март куни бошланади. Шунингдек, Туркияга келганимизга энди уч кун бўлди. Тошкентда эса асосан югуриш машқларини бажаргандик», — деди Шацких.