"Paxtakor" kecha Turkiyadagi yig‘ini doirasida Ukrainaning "Dnepr" jamoasiga qarshi o‘rtoqlik uchrashuvini o‘tkazib, yirik hisobda imkoniyatni boy berdi. Toshkentliklar ustozi Maksim Shaskix o‘yindan keyin o‘z fikrlari bilan o‘rtoqlashdi.

«Bu shunchaki yig‘in... Bundan tashqari, "Dnepr-1" va biz mazkur o‘yinga turli holatda keldik. Raqib deyarli bitta tarkib bilan o‘ynagan bo‘lsa, bizning birdaniga 6 futbolchimiz safdan chiqdi. Shuning uchun aralash tarkib bilan o‘ynashga to‘g‘ri keldi. Masalan, bizning nominal hujumchimiz o‘ng qanot himoyachisi vazifasini bajardi.

Shuningdek, biz asosiy tarkibda yoshlarni jalb qilyapmiz. Ular tajriba to‘plashini va tezroq o‘yin falsafamizni tushunib olishlarini istaymiz.

Shuning uchun bu bahsdan xulosa chiqarish qiyin. Agar asosiy tarkib bilan rasmiy uchrashuvda o‘ynaganimizda — boshqa gap edi. Albatta, "Dnepr-1" yaxshi shakllangan jamoa ekani ko‘rinib turibdi. Ammo biz ham o‘z darajamizni va qanday o‘ynashni bilamiz. Qisqa qilib aytganda, mazkur o‘yindan biror bir xulosa qilish qiyin. Bu shunchaki nazorat o‘yini edi.

Boz ustiga, "Dnepr-1"ning hozirgi holati boshqacha jamoa. Jamoa bir oydan keyin Konferensiyalar ligasi o‘yinida ishtirok etadi. Bizda esa yangi mavsum 3 mart kuni boshlanadi. Shuningdek, Turkiyaga kelganimizga endi uch kun bo‘ldi. Toshkentda esa asosan yugurish mashqlarini bajargandik», — dedi Shaskix.