Италия футбол федерацияси прокуратураси молиявий фирибгарлик учун “Ювентус”дан 9 очко олиб қўйишни талаб қилмоқда, деб хабар беради  Football Italia АNSА агентлигига таяниб.

"Ювентус" ва унинг собиқ раҳбарлари бухгалтерия ҳисобидаги фирибгарлик билан боғлиқ 4 та жиноий моддани бузганликда айбланмоқда. Энг оғирлари 8 йиллик қамоқ жазосини назарда тутади.

"Бянконери" раҳбариятига клубнинг молиявий аҳволи ҳақида ёлғон маълумот тарқатиш, бозорни манипуляция қилиш, мавжуд бўлмаган операциялар бўйича ёлғон даромад декларациясини тақдим этиш, аудиторлик назоратига тўсқинлик қилиш каби айбловлар қўйилиши мумкин.

Ноябр ойи охирида "Ювентус" директорлар кенгаши аъзоларининг аксарияти, жумладан президент Андреа Аньелли истеъфога чиқди.