Самарқандда бўлиб ўтган Ўзбекистон ва Эрон ёшлар термаси ўртасидаги ўйиндан кейин терма жамоалар техник директори Рустам Акрамовнинг маълум қилишича, терма жамоаларимизнинг бошқа ўйинлари яна Самарқанд шаҳрида ўтказилиши мумкин.

«Авваламбор, Ўзбекистон – Эрон ўйини ташкилотчилигини ажойиб тарзда ўтказганликлари учун мезбонларга миннатдорчилик билдираман. Барча ташкилий ишлар жуда юқори даражада ўтказилди. Қолаверса, ўйинда жамоамизни қўллаб-қувватлаш учун минглаб мухлисларнинг стадионга келганликларидан билса бўладики, самарқандлик мухлислар бундай халқаро учрашувларни соғиниб қолишган», - дейди терма жамоалар техник директори Рустам Акрамов.

Ушбу мутахасис сўзида давом этар экан, ЎФФнинг терма жамоалар ўйинларини фақат пойтахтда эмас, Самарқандда ҳам ўтказиш режаси борлигини айтиб ўтди.

«Умуман олганда, ЎФФ тузилган дастурига кўра, турли ёшдаги терма жамоаларимиз ўйинларини вилоятларда ҳам ўтказишни режалаштирган. Хусусан, яқин келажакда миллий терма жамоамизнинг ўртоқлик ўйинларидан бири Самарқандда ўтказилишини режага киритганмиз. Қолаверса, ушбу дастуримизга кўра, ўсмирлармиз, ёшлар терма жамоаларининг аксарият ўйинларини босқичма босқич вилоятларда, жумладан Самарқанд, Бухоро, Қарши, Андижон, Наманган, Фарғона ва бошқа шаҳарларимизда ўтказишни режалаштирганмиз. Зеро, барча терма жамоаларимиз таркиби бутун мамлакатимиздан йиғилган футболчилардан ташкил топган. Шундай экан, термаларимиз пойтахтдан ташқарида ҳам тўп суриб, мухлисларга байрам шукуҳини тақдим этиши керак» - дейди мамлакатимизнинг таниқли мутахасиси, профессор Рустам Акрамов биз билан суҳбатда.