Бошқача бўлиши мумкин эмас. Англия яна ўзининг бетакрор сюрпризлари, кутилмаган бурилишлари ва янги юлдузлари билан телевизорларимизда! Табриклаймиз.
Аввало “Арсенал”дан бошлаган маъқул. Робин ван Персисиз қолган “Арсенал” мухлислари учун илк турда қандайдир янги хиссиётлардан умид қилишга асослари етарли эди. Санти Касорла, Лукаш Подолски ва Журу жамоа ўйинига янги чизгилар бериши кутилганди. Йўқ, мезбонлар бутун учрашув давомида тўпга эгалик қилган бўлсалар-да, вазиятлардан унумли фойдалана олмадилар. Умуман “тўпчилар”нинг зарбалари нишонга аниқ етиб бормаётганини ҳам таъкидлаш жоиз. Ўйин давомида 25 дан ортиқ рақиб дарвозасини томон зарба берган Венгер шогирдлари атиги уч маротаба “Сандерленд” дарвозабонини ишлашга мажбур қилишди холос. Янгиларга келсак, Касорла ва Подолски илк дақиқалардан майдонга тушди. Касорла бир нечта қулай тўп узатишлари билан ёдда қолган бўлса германиялик полякнинг омади юришмади. Унинг ўрнига иккинчи бўлимда Журу майдонга чиқарилди. Франция чемпиони ўйинга актив қўшила олди, аммо у ҳам Касорланинг моҳирона тўп узатишини дарвозага аниқ йўлай олмади. “Арсенал” мавсумни голсиз дуранг билан бошлади.
Ўтган мавсумда АПЛ нинг энг яхши мураббийларидан бири бўлган Роджерсни олиб келган “Ливерпуль” эса мавсумни ўта омадсиз бошлади. “Вест Бромвич” меҳмони бўлган “марсисайдлик”лар йирик ҳисобда мағлубиятга учрадилар. Қизиғи, “Ливерпуль” мураббийи ва етакчи футболчиси – Аллендан айирган “Суонси” эса кутилмаганда ҳақиқий голлар шоусини тақдим этди. Меҳмонда тўп сурган бўлишига қарамасдан уэльсликлар бир нечта фтуболчилар билан кучайган “КПР” ни 5:0 ҳисобида енгдилар. Танишинг янги юлдуз – Мичу! Дарвоқе, Испания чемпионатига қизиқсангиз, ушбу футболчини жуда яхши биласиз. Ўтган йили “Райо Вальекано”ни елкасида кўтариб юрган ушбу ярим ҳимоячи жуда кўп голларга муаллифлик қилганди. Айтганча, “Суонси” ни ушбу мавсумда Лаудруп бошқараётганини ҳам таъкидлаш жоиз.
АПЛ га яна бир юлдуз Бундеслигадан келди. Ўтган мавсумни “Ҳамбург”да ўтказган хорватиялик ҳужумчи Петрич Лондондаги дебютини “а ля Погребняк” усулида бошлади. У “Норвич” дарвозасига икки гол киритиш билан бирга бир голга ҳаммуаллифлик қилди. “Фулҳэм” ҳам бешта гол билан мавсумни бошлади. Боя эслаганимиз Погребнякнинг янги жамоаси “Рединг” эса тўрт йиллик танаффусдан сўнг АПЛ даги дебютини дуранг билан бошлади. Умуман бугун майдонга тушган ҳар иккала дубютант ҳам майдонни очкосиз тарк этмади.
Бу ҳали ҳаммаси эмас. Асосий қаҳрамонлар энди майдонга тушиб келишмоқда. Ҳозирги паллада “Ньюкасл” Боашнинг “Тоттенҳэм”ини қаблу қилаётган бўлса, Манчестер жамоалари эртага ва индинга майдонга тушадилар.
РЕДИНГ – СТОК СИТИ 1:1
Голлар: Ла Фондр (90 пенальтидан) – Кейтли (34)
ВЕСТ ҲЭМ – АСТОН ВИЛЛА 1:0
Гол: Нолан (40)
КПР – СУОНСИ 0:5
Голлар: Мичу (8, 53), Дайер (63, 71), Синклэйр (81)
ФУЛҲЭМ – НОРВИЧ 5:0
Голлар: Дафф (27), Петрич (42, 54), Качаниклич (67), Седуэлл (87, пенальтидан)
ВЕСТ БРОМВИЧ – ЛИВЕРПУЛЬ 3:0
Голлар: Гера (43), Одемвинге (64 пенальтидан), Лукаку (77)
АРСЕНАЛ – САНДЕРЛЕНД 0:0
