«Бунёдкор» — «Нефтчи» учрашувидан кейинги матбуот анжуманининг иккинчи қисмида «Бунёдкор» устози қатнашди.

— Аввало, барча ўзбек халқини ва Сиз азиз журналистларни муборак ҳайит байрами билан муборакбод этмоқчиман. Ўйинга келадиган бўлсак, ҳар иккала жамоа аъзолари томонидан чиройли ва шиддаткор футбол намойиш этилди. Икки бор тезкор гол киритдик. Шунга қарамасдан рақиб довдираб қолгани йўқ. Бунга ўзимиз сабабчи бўлдик, деган бўлардим. Чунки 2:0дан сўнг босимни янада ошириш учун кетма-кет ҳужумлар уюштирдик. Бироқ Саҳоб Жўраев, Виктор Карпенко ва Лутфулла Тўраев тўпни рақибга олдириб қўйишди. «Нефтчи» футболчиларига эса бу ҳол қўл келди. Умуман олганда, ўйин тўлиқ бизнинг назоратимиз остида ўтди. «Нефтчи»нинг интизомли ўйини ва қарши ҳужумларга тезкор ўтиши менга ёқди, — деди Миржалол Қўшоқович.

— Илҳом Шомуродовнинг бугунги ўйинига қандай изоҳ берган бўлардингиз?
— Нафақат бугунги ҳаракатлари, балки “Андижон” билан ўйинда ҳам у рақиб дарвозасига йўл топа олмаяпти. Ҳужумчининг вазифаси — гол уриш! Бошқа ҳужумчиларимизга ҳам сўнгги зарбаларни беришда нимадир етишмаётгандек...

— «Бунёдкор»нинг икки нафар легионери — Славолюб Жоржевич ва Дэвид Карни захирада ўтиришибди. Шундан келиб чиқиб, бу танловларни хато десак бўладими?
— Ҳар қандай ўйинчи олинаётганида унга юз фоиз кафолатни ҳеч ким бера олмайди. Албатта, жамоага фойдаси тегадиган, маҳаллий ўйинчилардан бир бош баланд бўлган легионер танланади. Буни хато деёлмайман. Карни танланаётганида олдимда жудаям қисқа вақт бўлган холос. Унинг ҳозирги ҳолати маҳаллий ўйинчилардан юқори эмас.

— Интернет нашрларида «Бунёдкор» футболчилари ЎФФга арз қилиб боришгани ҳақидаги маълумотлар пайдо бўлди. Эмишки, 3 ойдан бери ўйинчиларга ойлик маошлари тўланмаётганмиш. Шу ростми?
— Мен ойлигимни ўз вақтида оляпман, футболчиларим белгиланган вақтда ойликларини олишяпти. Бу борада ҳеч қандай гап бўлиши мумкин эмас. Мен терма жамоа билан Иордания сафарида эдим. Шу пайтда футболчилар ЎФФга боришгани рост. Бироқ умуман бошқа масалада, яъни шартнома бандлари бўйича мурожаат этишган. Ҳайит байрамидан сўнг ҳаммамиз йиғилиб, ўзаро гаплашиб оламиз.

— Терма жамоамизнинг Иорданияда ўтказган ўртоқлик учрашувлари ва ушбу қисқа йиғин ҳақида нима дея оласиз?
— Истагандимки, терма жамоа етакчиларининг ушбу йиғинда иштирок этишларини. Чунки термамизнинг келажаги бўлмиш бир неча ёш футболчилар жалб этилишганди. Ёшлар тажрибали ўйинчилар орасида юриб, терма жамоа муҳитини ҳис қилишларини хоҳлагандим. Бироқ Одил Аҳмедов жароҳат олиб келолмади. Анзур Исмоиловнинг боши ёрилган эди. Виталий Денисовни клуби билан муаммолари борлиги учун йиғинга чақирмай туришимни сўради. Ташкилотчиларнинг эътиборсизлиги натижасида Тошкент-Деҳли-Манама-Амман йўналиши бўйича парвоз қилишга тўғри келди. Шу жиҳат манзур келмади. Лекин иорданияликларга ваъда берганимиз ва иккита ўйинга келишиб қўйганимиз учун сафарга отланавердик. Ўтказилган учрашувлардан ўзимга керакли хулосаларни чиқариб олдим. Ёшларнинг кўпчилиги яхши таассурот уйғотишди. Масалан, Шохруҳ Гадоев шу савияда ўсаверса, эртами-кеч ундан кучли футболчи етишиб чиқади.