Бекободда бўлиб ўтган “Металлург” – “Насаф” учрашувидан кейин мезбон жамоа бош мураббийи Рустам Мирсодиқовнинг бугунги ўйин ҳақидаги фикрлари билан қизиқдик.
“Ҳар бир ўйинни олдиндан нима билан тугашини айтиб бўлмайди, бу футбол. Бизда учрашув давомида 4-5та қулай вазиятлар бўлди, биз шу вазиятларнинг биринчисидан унумли фойдаландик. “Насаф” жамоаси 2-ўринда бормоқда, уларни бугунги ўйинга кучли тайёрлаш ҳам уйлайманки шарт эмас эди, улар доимо ҳужумкор ўйин намойиш этишади, биз турнир жадвалининг охирги ўринларидан бирида бормоқда эдик ва ўтган учрашувларда кўплаб очколар йўқотдик, бугунги эришган 3 очкомиз биз учун гўё олтинга тенг бўлди. “Насаф”дан 3 очко "тортиб олиш"ни ҳар қандай жамоа ҳам уддалай олавермайди, бу биз учун жуда яхши натижа бўлди деб ўйлайман” – деди Рустам Мирсодиқов.
- Жамоалар ўртасидаги учрашувларнинг натижаларига бир назар солсак, бу йил ҳисобидан иккала жамоа тўртинчи бор учрашди, кўпчилик футбол мухлисларининг фикрича гўёки икки жамоа келишиб ўйнаётгандек, бунга нима дейсиз?
- Энди мухлислар айтаверишади (кулиб), мана ўйинни ўзларингиз тўлиқ кўрдиларингиз, шу келишилган ўйинга ухшайдими, ўйинда ҳаттоки четлатиш ҳам бўлди, ўйинчилар жонини Жабборга бериб ўйнашди, ҳаттоки майдонда тортишувлар ҳам бўлиб турди, ёки пенальти берилгани йўқ, бундай ўйинни келишилган деб баҳо бериш менимча тўғри бўлмайди.
- Бугунги ҳакамлар ҳақидаги фикрингиз қандай?
- Мен ҳакамлар ишига ҳеч қачон баҳо бермаганман.
- Жамоангиз доим иккинчи даврага келиб, доимо бироз кучли ўйин намойиш қила бошлайди, бу нимага боғлиқ?
- Биз доимо яхши ўйин кўрсатишга ҳаракат қиламиз, мақсадимиз бекободлик мухлисларни хурсанд қилиш.
Биз шунингдек, ўйин тугагандан сўнг “Насаф” бош менеджери Шамил ака Ярулин билан қисқа суҳбат қилишга муяссар бўлдик, у кишининг ҳам бугунги учрашув натижаси анча кайфиятини бузганлиги кўриниб турар эди ва мухлислар номидан у кишига: “Насаф” жамоаси У.Тошев бош мураббийлиги остида, бу ўйин билан кўзланган мақсадларга эриша олмаслигини” айтдик, у киши бу фикримизга қисқа қилиб: “кўрамиз ҳали ва бу ҳақда кейинроқ албатта гаплашамиз” деб қуя қолдилар.