"Зенит" ҳужумчиси Малком "Зенит" раҳбарларига "ПСЖ"га ўтишни истаётганини айтди, деб хабар беради Telefoot.
Манбага кўра, бразилиялик футболчи "ПСЖ"га ўтмоқчи ва бу ҳақда "Зенит" раҳбариятини хабардор қилган. Россия клуби вингерни қўйиб юбориши мумкин. Парижликларнинг спорт масалалари бўйича маслаҳатчиси Луиш Кампуш ва барча манфаатдор томонлар ўртасида учрашув бўлиб ўтди.
Айни дамда "ПСЖ" "Зенит"га расмий таклиф юбормаган. Хабар қилинишича, француз клубида молиявий фейр-плей чекловлари туфайли шартномани якунлаш учун кўп имкониятлар йўқ, шунинг учун клуб футболчини ижарага олмоқчи.
Ўтган ёзда Малком "Зенит" билан 2027 йилнинг июн ойи охиригача мўлжалланган янги шартнома имзолаган эди. Transfermarkt портали 25 ёшли футболчининг нархини 24 миллион еврога баҳоламоқда.
Жорий мавсумда бразилиялик футболчи Санкт-Петербург клуби сафида 23 та ўйин ўтказиб, 15 та гол ва 7 та голли узатмани амалга оширган.
