"Вест Хэм" ярим ҳимоячиси Деклан Райс ҳали ҳам "Челси"га қайтиши мумкин. Райс "Челси"да 16 ёшида "болғачилар" сафига қўшилишдан олдин ўйнаган.
Журналист Адам Ньюсоннинг сўзларига кўра, Райс яқинда Энцо Фернандес 120 миллион евро эвазига "Челси"га ўтганига қарамай, келаси ёзда "Стемфорд Бриж"га ўтиши мумкин.
Эслатиб ўтамиз, Райсга Лондоннинг бошқа бир клуби - "Арсенал" ҳам даъвогарлик қилмоқда. Олдинроқ Деклан "Челси"га қайтишдан кўра "канонирлар"га ўтишни афзал кўраётгани хабар қилинганди.
"Вест Хэм" Райсни 100 миллион еврога баҳолайди. Футболчининг "болғачилар" билан шартномаси кейинги мавсум охирида якунига етади.
