Эль-классиколар доим ҳам муросали курашларга бой бўлмаган. Қайси маънода? Иккала томон ҳам ортиқча эътирозларсиз, ташқи таъсирларсиз фақат майдонда баҳсга киришган десам, ҳеч ким ишонмаслиги табиий. Бу сафар эса менимча, барчаси рисолагидек, бўлди. Ҳақиқий кураш ҳақиқий жанг эвазига ғолиб жамоа аниқланди.

Ҳисобга қараб ўтган йилги суперкубокни эсга олгандирсиз? Ҳа, айнан Каталониядаги учрашувда "Барселона" ҳудди шу ҳисобда ғалаба қозонган, унга қадар эса Мадридда "Реал" мезбонлигидаги учрашув 2:2 ҳисобидаги дуранг билан тугаган ва натижада суперкубок Каталонияга йўл олганди. Бу сафар эса энди бу "сериал"нинг бошланиши...

Учрашувнинг биринчи бўлими мезбонларнинг устунлиги ва меҳмонларнинг қўпол ҳаракатлари билан ёдда қолди. Албатта ёдингизга келган ўша вазият бу — Хавининг дарвозабон билан бирга-бир вазиятга чиқиб бораётган вазиятда Рауль Альбиоль томонидан унинг чалиб йиқитилгани ва бу ҳолатда карточка кўрсатилмагани келди. Умуман бунақа вазиятда ҳакам қаттиққўллик билан қарор чиқариши ҳам мумкин эди. Бироқ вазият шунақа эдики, биргина қаттиққўллик билан чиқарилган қарор ҳам ўйинни бузиб юбориши мумкин эди. Буни яхши ҳис қилган ҳакам Альбиолни огоҳлантириб ўтирмади.

Умуман биринчи бўлим ҳақида умумий хулоса сифатида шуларни айтиш мумкин. Биз юқорида эслатган ҳақиқий "Эль-Классико"ни эслатадиган ўйин эса асосан иккинчи бўлимда кўзга ташланди.

Иккинчи бўлимда энди "Реал" ҳам тез-тез олдинга ўта бошлади. Асосан қарши ҳужумлар эвазига бўлсада, жамоа ҳужумлар ташкил қилди. Айнан шундай вазиятда жамоанинг дастлабки ҳақиқий хавфли ҳужуми гол билан якунланди. Криштиану Роналду  бир неча рақиб қуршовида бўлишига қарамай Вальдес қўриқлаётган дарвозани нишонга олди.

Бироқ бу хурсандчилик узоққа чўзилгани йўқ. Орадан бир дақиқа ўтар-ўтмас мезбонлар ҳам гол билан жавоб қайтаришди. Маскеранонинг диагонал кесма пасидан кейин Педро дарвозабон билан бирга-бир вазиятда қолди ва бундай имкониятни қўлдан бой бермади.

Тезкор жавоб "Барселона"нинг ўйинини янада жонлантириб юборди. Кетма-кет ҳужумлар Иниеста-Хави-Алвеш-Месси боғламининг занжирдек амалга оширган узатмалари "Реал" ҳимоясини хато қилишга, қўполлик ишлатишга мажбур қилди. Айнан шундай вазиятларнинг бирида жарима майдончаси ичида Иньестага нисбатан Серхио Рамос қўполлик ишлатди ва Месси пенальти тепиш имкониятига эга бўлди. Аргентиналик футболчи бу сафар мўлжалда адашмади ва ҳисобда жамоасини олдинга олиб чиқди. Кейин Хави... Хуллас вазият бутунлай ўзгариб иккинчи ўйинга бўлган қизиқишни ҳам ўлдираётгандек эди. Бироқ 85-дақиқага келиб Вальдес интригани сақлаб қолгиси келиб қолди...

Бироз қўполлик билан бўладими, хуллас Вальдес ёш болаларча қилган хатосини Ди Мария жазолади ва ҳисобдаги фарқни минимал даражада қисқартирди. Бу якуний ҳисобга сабаб бўлди.

Твиттер ижтимоий тармоғи фойдаланувчиларидан бири ўйин тугагач, шундай твит ёзиб қолди: "Сантьяго Бернабэу"да "олов" ёниши учун интригани сақлаб қолганинг учун раҳмат сенга, Вальдес!" Нима ҳам дердик биз ҳам бу фикрга қисман бўлсада қўшиламиз. Чунки бизни бундан қизиқарли ўтиши кутилаётган жавоб учрашуви кутмоқда.

Испания Суперкубоги
Дастлабки учрашув

БАРСЕЛОНА – РЕАЛ Мадрид 3:2 (0:0)
Голлар: Педро (56), Месси (70, пенальти ), Хави (78) – Роналду (55), Ди Мария (85).

Барселона: Вальдес, Дани Алвес, Пике, Маскерано, Адриано, Хави (Фабрегас, 83), Бускетс, Иньеста, Санчес (Тельо, 72), Месси, Педро (Альба, 87).
Реал Мадрид: Касильяс, Арбелоа, Альбиоль, Рамос, Коэнтрау, Хедира, Алонсо, Озил (Марсело, 82), Кальехон (Ди Мария, 66), Роналду, Бензема (Игуаин, 61).
Огоҳлантиришлар: Маскерано (45) - Алонсо (11), Арбелоа (44), Альбиоль (51).