Бугун биз футбол майдонидаги ютуқлари бўйича отасидан устун бўлган машҳур футболчилар ҳақида гаплашамиз. Шунинг учун, ушбу рўйхатда Эрлинг Холанд ёки Паоло Мальдинилар йўқ. Аммо ўғил нафақат отасининг ишини давом эттирган, балки ундан ҳам яхшироқ бўлган бошқа кўплаб қизиқарли воқеалар мавжуд.
Гонсало Игуаин ва Хорхе Игуаин
Гонсало 1987 йилда Францияда туғилган. Унинг онаси Ненси Закариас рассом бўлган, отаси эса ўша пайтда «Брест»да ўйнаган ва бу унинг фаолиятидаги ягона Европа клубига айланган. Фақат 10 ой ўтгач, оила Аргентинага қайтиб келди. Эътиборлиси, Гонсало француз паспортига эга, аммо у француз тилини билмайди.
Хорхе Игуаин марказий ҳимоячи сифатида ўйнади. Унинг энг юқори кўрсаткичлари «Бока Хуниорс» (1986-1987) ва «Ривер Плейт» (1988-1991) жамоаларида бўлиб, Аргентинада икки марта чемпионликни қўлга киритган. Хорхе ва Ненсининг тўрт ўғли бор: Николас, Лаутаро, Гонсало ва Федерико. Бироқ, фақат охирги иккитаси отасининг изидан боришди. Гонсало ва Федерико «Ривер Плейт»да бирга ўйнашган, фаолиятлари охирида эса «Интер Майами»да ҳам бирга тўп тепишди. Бундан ташқари, Гонсалони отаси билан бирлаштирган яна бир қизиқ факт бор. 1990 йилда «Ривер Плейт» ва «Бока Хуниорс» ўртасидаги Суперкласикода «Ривер» сафида тўп тепган Хорхе рақиб дарвозасига гол урди ва бу унинг жамоасига 2:0 ҳисобида ғалаба қозониш имконини берди. Орадан 16 йил ўтиб, 2006 йилда ёш Гонсало «Бока Хуниорс»га қарши ўйинда дубл қайд этиб, «миллионерлар»га ғалаба қозониш имконини берди (3:1). Ана ўхшашлик!
Лерой Сане ва Сулаймон Сане
Сулаймон Сане Сенегалда туғилган ва у тўрт ёшга тўлганда, унинг оиласи Францияга кўчиб ўтган. 1982 йилда француз армияси таркибида Сане Ғарбий Германияга келди ва у ерда бир йил хизмат қилди. Бироз вақт ўтгач, Сулаймон «Фрайбург» билан шартнома имзолади. 1987/88 йилги мавсумда у 21 та гол уриб, иккинчи Бундеслиганинг энг яхши тўпурари бўлди. 1990 йилда «Ваттеншайд 09» Бундеслигага қайтди ва ҳужумчи билан шартнома имзолади. Сулаймон 4 мавсум давомида «кулранг сичқонлар» таркибида 39 та гол уриб, Бундеслига тарихидаги клубнинг энг яхши тўпурарига айланди. Кейинчалик, ҳужумчи Австрия ва Швейцарияда ўйнади, кейин яна «Ваттеншайд 09»га қайтди.
Сулаймон Бундеслига тарихидаги илк африкалик футболчилардан бири. Сане ўзининг тезлиги билан ажралиб турарди. У 100 метр масофани 10,7 сонияда босиб ўта олди. Лерой ҳам тезликни отасидан олганга ўхшайди. Футболчилик фаолиятини якунлагач, Сулаймон Занзибар терма жамоаси (2008-2011) ва «Ваттеншайд 09»ни бошқарган. 1996 йилда Лерой туғилган. Леройнинг онаси Регина Вебер машҳур немис бадиий гимнастикачиси эди. У кўплаб Германия чемпионатларида ғолиб чиқди ва 1984 йилги Лос-Анжелес Олимпиадасида бронза медалини қўлга киритди. Вебер бугунги кунгача бадиий гимнастика бўйича Олимпия медалини қўлга киритган ягона немис бўлиб қолмоқда. Леройнинг иккита акаси бор. Ким (ундан бир ёш катта) Германиянинг қуйи лигаларида ўйнаган ва 2017 йилда 22 ёшида нафақага чиққан. Ҳозир 19 ёшда бўлган Сиди «Шальке» ёшлар жамоасида ўйнайди. Уч ака-ука ҳам оталарини ҳалигача эслатиб турадиган «Ваттеншайд 09» ёшлар жамоасида ўйинларни бошладилар.
Мартин Эдегор ва Ханс Эрик Эдегор
Ханс Эрик ўз фаолиятининг кўп қисмини «Стрёмсгодсет» (1994-2003) жамоасида ўтказди, у ўша пайтда Норвегия олий лигасида бўлган, кейин эса қуйи лигага тушиб кетди. Бироқ, унинг отаси Норвегия чемпионатидан ташқари бошқа жамоага ўта олмай, шон-шуҳрат топа олмади. Мартин 1998 йилда Драммен шаҳрида таваллуд топган. Ёшлигида кичик Эдегор отасига тегишли бўлган «Драммен Стронг» академиясида ўйнаган. Мартиннинг ота-онаси дарҳол ўғлининг карьерасини ривожлантиришга киришдилар. Улар уйнинг ёнида сунъий майдон ясаш учун 50 000 крон тўлашди. 9 йилдан сўнг «Стрёмсгодсет» Мартиннинг оиласига 100 000 крон тўлади, чунки ёш ўйинчи 2014 йилнинг энг яхши иқтидори совринини қўлга киритди. 2015 йилда Эдегор «Реал Мадрид»га сотилганида, «Драммен Стронг» академиясига 250 минг крон фойда келтирган. Ханс Эрик ўғли билан бирга Мадрид клубига ҳам йўл олди ва у «қаймоқранглилар»нинг ёшлар жамоаларини тайёрлашни бошлади. 3 йиллик шартнома имзолаган Ханс болалар билан ишлаш учун йилига 100 000 евро олган. Бундан ташқари, у 3 миллион евро миқдорида бир марталик бонус олиш ҳуқуқига эга эди. Шу тариқа, 2015 йилдан 2017 йилгача «Реал Мадрид»да ишлаган Ханс Эрик тахминан 3,3 миллион евро олди. Ўшанда «Реал Мадрид U-23»ни бошқарган Зинедин Зидан ҳар мавсумда 600 минг ишлаб олган. Ҳатто 3 йил ичида ҳам Зизу Мартин Эдегорнинг отаси олган пулни топа олмаган. Мартин ва Ханс Эрик кейинчалик бошқа йўллардан кетишди. Ота Норвегиянинг иккинчи дивизионидаги«Саннефьорд» клубини бошқарди, ўғли эса «Арсенал»да қолди.
Пьер-Эмерик Обамеянг ва Пьер-Франсуа Обамеянг
Пьер-Эмерикнинг отаси Габонда туғилган, бироқ кейинчалик Францияга кўчиб ўтган ва у ерда маҳаллий клубларда ўйнай бошлаган. Бироқ, Франция фуқаролигини олиш учун отаси фақат битта исм қолдириши керак эди, натижада у Обамеянг бўлди. Ярим ҳимоячи сифатида ўйнаган Пьер-Франсуа «Лаваль», «Гавр», «Тулуза» ва «Ницца» клубларида ўйнаган. Габон терма жамоаси сафида 29 та ўйин ўтказиб, 4 та гол урган. «Челси» ва Франция терма жамоасининг собиқ ҳимоячиси Франк Лебёф қизиқарли воқеани эслади. 90 йилларнинг охирида «Лаваль» учун ўйин пайти Обамеянг шу қадар касал бўлиб қолдики, у юра олмади. Лебёфнинг таъкидлашича, шифокорлар унинг жамоадошини даволай олишмаган, аммо марабут (мусулмон диний раҳбари) қора сеҳр ёрдамида Пьер-Франсуани том маънода оёққа турғазди. Профессионал фаолиятни тугатгандан сўнг, Обамеянгларнинг каттаси «Милан»да скаут бўлиб ишлади, ўғли ўз фаолиятини шу ерда бошлади. Пьер-Эмерикнинг Вилли ва Катилин исмли иккита акаси бор, улар асосан у қадар таниқли бўлмаган жамоаларда ўйнашган.
Серхио Бускетс ва Карлес Бускетс
Карлес «Барселона» тарбияланувчиси бўлиб, у ерда деярли бутун фаолиятини 90 йилларда дарвозабон сифатида ўтказган. Аммо кўп мавсумларда Бускетс Андони Субисаррете, Витору Байе ва Руду Хеспга ўз ўрнини бўшатиб, иккинчи дарвозабон бўлиб юрган. У фақат 1994/95 ва 1995/96 мавсумларида мураббийнинг биринчи танлови бўлган. Бироқ Карлес футболчилик фаолиятини ҳужумчи сифатида бошлаган. Карлеснинг ўзига хос хусусияти бор эди - кипер оёқлари билан мукаммал ўйнаган, бу ўша пайтда ўз позициясининг вакили учун камдан-кам учраган. Машҳур француз газетаси L'Équipe уни «қўлсиз дарвозабон» деб атаган.
Бундан ташқари, Карлес иссиқ ҳавода ҳам шортикларда эмас, шимда чиқиш қилган. Катта Бускетс буни машғулотларда уларни кийишга ўрганиб қолгани, шу боис ўйинлар вақтида майдонга шимида киришга қарор қилгани билан изоҳлади. Шунинг учун у тиззаларини жароҳатлардан кўпроқ ҳимояланган деб ҳисоблади. Аммо ўша пайтда мухлислар Карлес шу йўл билан чандиқ ёки татуировкани яширишга уринаётганини ҳам тахмин қилишган. Нафақага чиққанидан кейин Серхионинг отаси Каталония клубига дарвозабонлар мураббийи сифатида қайтди. У шу кунгача бу лавозимни эгаллаб, «Барселона Б» билан ишламоқда. Ва унинг ўғли «кўк-анорранглилар»нинг афсонасига айланди.
Диего Форлан ва Пабло Форлан
Диеголар оиласи том маънода футболга иштиёқли эди. Унинг она томондан бобоси Хуан Карлос Корассо «Индепендиенте»нинг таниқли футболчиси ва кейинчалик Уругвай терма жамоасини бошқарган. Унинг амакилари Рикардо Боccини ва Хосе Омар Пасторис ҳам «Индепендиенте»да ўйнаган. Диегонинг отаси Пабло Форлан «Пеньярол» билан тўрт марта Уругвай чемпионлигини қўлга киритган, шунингдек, Либертадорес кубогини қўлга киритган, 1966 ва 1974 йилги жаҳон чемпионатларида қатнашган.
Эътиборлиси, Диего Форлан ўз оиласи изидан бора олмади. Ёшлигида у нафақат футболни, балки теннисни ҳам яхши кўрарди. Диего Марадона туфайли дунёнинг энг яхши спорт турини танлади. 1991 йилда унинг синглиси автоҳалокатга учради, натижада ногирон бўлиб қолди. Оила операция учун пул тўлай олмади, бироқ Марадона маблағ йиғишга ёрдам берди. Ушбу ҳаракатдан илҳомланган Диего Форлан синглисига пул топиш учун футболчи бўлишга қарор қилди. Қизиғи шундаки, Диегонинг амакиси ва отаси Уругвай терма жамоаси таркибида Америка кубогини қўлга киритган, 2011 йилда кичик Форлан ҳам муваффақиятга эришган.
