Январь давомида АПЛ клублари жами 815 миллион фунтни трансферлар учун сарф этишди. Ушбу қийматнинг учдан бир қисми "Челси"га тегишлидир. Бу жамоа саккизта футболчига жами 326 миллионни қурбан қилган. Қуйида барча харидлардан энг яхшиларини танлаб олдик ва уларни рамзий терма жамоага киритдик.
Дарвозабон: Кейлор Навас – "Ноттингем"
36 ёшли футболчи Париждан ташриф буюрди. "Ноттингем" уни мавсум охирига қадар ижарага олган. Навас фаолияти давомида уч бор ЕЧЛни ютган. Унинг ҳисобида яна учта мамлакат чемпионлиги ҳам мавжуд. Эндиликда у Дин Хендерсон ўрнини тўлдиришга ҳаракат қилади.
Қанот ҳимоячиси: Педро Порро – "Тоттенхэм"
Испания терма жамоаси аъзоси январнинг сўнгги кунида кўчишни амалга оширди. Сал қолса, трансфер барбод бўлиши ҳам мумкин эди. Аммо "Тоттенхэм" ирода кўрсатди ва футболчига 42 миллион евролик таклиф киритди. Порро "Манчестер Сити"га ўтиши ҳам мумкин эди.
Марказий ҳимоячи: Илья Забарный – "Борнмут"
"Борнмут"нинг янги эгалари яхши сармояга эга эди. Шу сабаб клуб истаган футболчи учун пулни аямади. 20 ёшли иқтидор 24 миллион фунт эвазига Киевнинг "Динамо" клубидан олиб келинди.
Марказий ҳимоячи: Бенуа Бадиашиле – "Челси"
Француз футболчиси Тодд Бёлининг янги йилдаги нишонларидан бири эди. "Монако" 21 ёшли ҳимоячини 35 миллион эвазига қўйиб юборди. У келажакда Тиагу Силвани ўрнини босади деб ҳисобланмоқда. Бадиашиле ҳавода ва тўп билан ҳаракат қилишда жуда ҳам устаси фарангдир.
Қанот ҳимоячиси: Виктор Кристансен – "Лестер Сити"
"Тулкилар" сўнгги йиллардаги энг омадсиз мавсумларидан бирини ўтказмоқда. Шу сабаб таркибни кучайтириши лозим эди. Айнан мана шу мақсадда улар Дания футбол бозорига кириб борди ва ўзи билан 20 ёшли чап қанот ҳимоячисини олиб қайтди. Кирстансен ёш бўлишига қарамай, анча тажрибага эга. Унинг трансфери "Лестер" учун 17,5 миллион фунтга тушган.
Ярим ҳимоячи: Жоржиньо – "Арсенал"
Январнинг энг яхши харидларидан бири "Арсенал" томонидан бажарилди. "Челси" эса тажрибали футболчисини атиги 12 миллион эвазига қўйиб юборишга мажбур бўлди. Жоржиньо яқин ўтмишда ЕЧЛ, УЕФА суперкубоги ва жаҳон чемпионлигини қўлга киритган. Шунингдек, ярим ҳимоячи 2021 йилда қитъа чемпиони ҳам бўлганди.
Ярим ҳимоячи: Энцо Фернандес – "Челси"
Жаҳон чемпиони бўлган футболчи Қатарда энг порлоқ юлдузлардан бирига айланганди. Энцонинг нархи олти ойда 20 миллион фунтдан 107 миллионга кўтарилиб кетди. Ҳаммаси мундиалнинг эффекти эди. Футболчининг трансфери рекордга сабаб бўлди.
Ярим ҳимоячи: Жоао Гомеш – "Вулверхэмптон"
Беқарорликдан қийналаётган яна бир АПЛ жамоаси бу "бўрилар"дир. Клуб январда 6 та футболчи харид қилди. Улар ичида энг кўзга кўрингани эса 21 ёшли Гомешдир. "Фламенго"дан 15 миллион фунтга олиб келинган ярим ҳимоячи, АПЛда порлаши кутилмоқда.
Чап қанотда: Михаил Мудрик – "Челси"
Мудрик 88 миллион фунт эвазифа Донецк шаҳрининг "Шахтёр" жамоасидан сотиб олинди. 22 ёшли ҳужумчи "Челси" учун умид манбаларидан бири бўлиб қолмоқда.
Марказий ҳужумда: Антуан Семеньо – "Борнмут"
Семеньо Жаҳон чемпионатида Гана терма жамоаси билан иштирок этганди. 23 ёшли вингерни бутун дунё томоша қилган. "Борнмут" ҳам ҳужумчини кузатиб келаётганди. Шу сабабли дарров уни сотиб олди. "Бристол Сити" эса Семеньо трансферидан 10,5 миллион фунт фойда кўрди.
Ўнг қанотда: Коди Гакпо – "Ливерпуль"
Рўйхатдаги яна бир мудиал юлдузларидан бири бу Гакподир. У Қатарда 3 та голга муаллифлик қилди. 21 ёшли ҳужумчи "ПСВ"дан 45 миллион фунт эвазига "Ливерпуль" томон йўл олганди. У ҳозирга қадар бир нечта ўйинларда майдонга тушиб, гол уришга эриша олгани йўқ.
ИСМАТОВ Ж.
