Маълумки, Андижондаги “Бобур Арена” стадионида майдон чимини тубдан яхшилаш бўйича ишлар олиб борилмоқда. Майдон сифатини идеал даражага келтириш ва  фойдаланишга рухсат берилиши учун бироз вақт керак бўлади.

Шу сабабдан андижонликлар ўз уй ўйинларини вақтинча қўшни Фарғона шаҳридаги “Истиқлол” стадионида ўтказиб туради.

Бу хусусида “Андижон” клуби бош директори Улуғбек Мирзаев қуйидагиларни айтди:

“Истиқлол” стадиони ва “Андижон” клуби ўртасида ижара шартномаси имзоланган. Клуб тўловни амалга оширади. Лекин чипталар савдоси “Андижон” футбол клубида қолади.

Шу ўринда бизни қучоқ очиб қабул қилгани учун “Истиқлол” стадиони раҳбариятига алоҳида миннатдорчилик билдираман. Шу билан бирга бизга ҳужжатлаштириш ишларида, ЎзПФЛ талаб этаётган стадионга оид ташкилий хужжатларни расмийлаштиришда яқиндан ёрдам бераётган “Истиқлол” стадиони директори Илҳомжон Сабидовга ҳамда “Истиқлол” стадиони маркетинг мутахассиси Нодирбек Саидовга ташаккур билдирамиз.  

Шунингдек, бу стадиондан дастлаб “Андижон-SGS” жамоаси ҳам фойдаланиши режалаштирилганди. Бироқ ЎзПФЛ талабига кўра битта стадионда иккита жамоадан ортиғи бўлмаслиги керак. Шунинг учун “Андижон” жамоаси манфаати йўлида клубимиз ва унинг мухлисларига қулайлик яратиб беришда фаоллик кўрсатиб, “Турон” клубининг Яйпандаги “Ўзбекистон” стадионидан фойдаланишга рози бўлгани учун “Андижон-SGS” раҳбари Зафархўжа Раҳимовга алоҳида миннатдорчилик билдираман”, — деди “Андижон” клуби бош директори Улуғбек Абдусатторович.

“Андижон” матбуот хизмати.