Ma’lumki, Andijondagi “Bobur Arena” stadionida maydon chimini tubdan yaxshilash bo‘yicha ishlar olib borilmoqda. Maydon sifatini ideal darajaga keltirish va  foydalanishga ruxsat berilishi uchun biroz vaqt kerak bo‘ladi.

Shu sababdan andijonliklar o‘z uy o‘yinlarini vaqtincha qo‘shni Farg‘ona shahridagi “Istiqlol” stadionida o‘tkazib turadi.

Bu xususida “Andijon” klubi bosh direktori Ulug‘bek Mirzayev quyidagilarni aytdi:

“Istiqlol” stadioni va “Andijon” klubi o‘rtasida ijara shartnomasi imzolangan. Klub to‘lovni amalga oshiradi. Lekin chiptalar savdosi “Andijon” futbol klubida qoladi.

Shu o‘rinda bizni quchoq ochib qabul qilgani uchun “Istiqlol” stadioni rahbariyatiga alohida minnatdorchilik bildiraman. Shu bilan birga bizga hujjatlashtirish ishlarida, O‘zPFL talab etayotgan stadionga oid tashkiliy xujjatlarni rasmiylashtirishda yaqindan yordam berayotgan “Istiqlol” stadioni direktori Ilhomjon Sabidovga hamda “Istiqlol” stadioni marketing mutaxassisi Nodirbek Saidovga tashakkur bildiramiz.  

Shuningdek, bu stadiondan dastlab “Andijon-SGS” jamoasi ham foydalanishi rejalashtirilgandi. Biroq O‘zPFL talabiga ko‘ra bitta stadionda ikkita jamoadan ortig‘i bo‘lmasligi kerak. Shuning uchun “Andijon” jamoasi manfaati yo‘lida klubimiz va uning muxlislariga qulaylik yaratib berishda faollik ko‘rsatib, “Turon” klubining Yaypandagi “O‘zbekiston” stadionidan foydalanishga rozi bo‘lgani uchun “Andijon-SGS” rahbari Zafarxo‘ja Rahimovga alohida minnatdorchilik bildiraman”, — dedi “Andijon” klubi bosh direktori Ulug‘bek Abdusattorovich.

“Andijon” matbuot xizmati.