Қатарлик инвесторлар “Манчестер Юнайтед” клубини сотиб олишга жиддий киришмоқчи.

Daily Mail нашрининг хабар қилишича, қатарлик бир қатор миллиардерлар “Манчестер Юнайтед”ни сотиб олмоқчи ва тез орада катта таклиф билан чиқади. Таклиф Глейзерларни қаноатлантиришига инвесторларнинг ишончи комил.

“Манчестер Юнайтед” эгалари клубни 6 миллион фунтдан кўпроқ миқдордаги маблағга пулламоқчи. Шунингдек, клубни сотиб оладиган инвестор “Олд Траффорд”ни реконструкция қилиши ёки уни бузиб ташлаб, ўрнида ултразамонавий арена барпо қилиши керак бўлади. Бундай лойиҳа тахминан 2 миллиард фунтга айланади ва қатарлик инвесторлар учун бу муаммо бўлмайди.

Қатарлик инвесторлар клубни лойиҳалаштиришда мухлисларнинг фикрини инобатга олмоқчи. “Олд Траффорд” масаласи ҳам мухлисларнинг қарашларига қараб ҳал қилинади.

Qatar Sports Investments компаниясининг “ПСЖ”га эгалик қилиши қатарликлар учун “Манчестер Юнайтед”ни сотиб олишда тўсқинлик қиладиган жиҳатлардан бири бўлиши мумкин. Бир ташкилотга тегишли клублар битта мусобақада қатнашиши мумкин эмас. “Манчестер Юнайтед” ва “ПСЖ” Еврокубокларда ўзаро тўқнаш келиб қолиши мумкин.

Келишувни амалга ошириш учун АПЛ рухсати керак бўлади. Мамлакатдаги инсон ҳуқуқлари билан боғлиқ муаммолар сабаб “Манчестер Юнайтед”ни сотиб олишда қатарликларга кўплаб тўсқинликлар бўлиши кутилмоқда.

Қатар амири Тамим ибн Ҳамад ат-Тани “Манчестер Юнайтед”нинг мухлиси ҳисобланади. У клуб тарихидан жуда яхши хабардор. 2011 йилда ат-Тани “Манчестер Юнайтед”ни сотиб олишга ҳаракат қилган ва Глейзерларга 1 миллиард фунтдан кўпроқ пул таклиф қилганди. Бироқ унинг таклифи рад этилган. Ўша йили қатарликлар “ПСЖ”нинг 70% акциясини сотиб олганди.

Қатарликларга бу борада “Манчестер Юнайтед” мухлиси ҳисобланган британиялик миллиардер Жим Ретклифф рақобат қилади.