Qatarlik investorlar “Manchester Yunayted” klubini sotib olishga jiddiy kirishmoqchi.

Daily Mail nashrining xabar qilishicha, qatarlik bir qator milliarderlar “Manchester Yunayted”ni sotib olmoqchi va tez orada katta taklif bilan chiqadi. Taklif Gleyzerlarni qanoatlantirishiga investorlarning ishonchi komil.

“Manchester Yunayted” egalari klubni 6 million funtdan ko‘proq miqdordagi mablag‘ga pullamoqchi. Shuningdek, klubni sotib oladigan investor “Old Trafford”ni rekonstruksiya qilishi yoki uni buzib tashlab, o‘rnida ultrazamonaviy arena barpo qilishi kerak bo‘ladi. Bunday loyiha taxminan 2 milliard funtga aylanadi va qatarlik investorlar uchun bu muammo bo‘lmaydi.

Qatarlik investorlar klubni loyihalashtirishda muxlislarning fikrini inobatga olmoqchi. “Old Trafford” masalasi ham muxlislarning qarashlariga qarab hal qilinadi.

Qatar Sports Investments kompaniyasining “PSJ”ga egalik qilishi qatarliklar uchun “Manchester Yunayted”ni sotib olishda to‘sqinlik qiladigan jihatlardan biri bo‘lishi mumkin. Bir tashkilotga tegishli klublar bitta musobaqada qatnashishi mumkin emas. “Manchester Yunayted” va “PSJ” Yevrokuboklarda o‘zaro to‘qnash kelib qolishi mumkin.

Kelishuvni amalga oshirish uchun APL ruxsati kerak bo‘ladi. Mamlakatdagi inson huquqlari bilan bog‘liq muammolar sabab “Manchester Yunayted”ni sotib olishda qatarliklarga ko‘plab to‘sqinliklar bo‘lishi kutilmoqda.

Qatar amiri Tamim ibn Hamad at-Tani “Manchester Yunayted”ning muxlisi hisoblanadi. U klub tarixidan juda yaxshi xabardor. 2011 yilda at-Tani “Manchester Yunayted”ni sotib olishga harakat qilgan va Gleyzerlarga 1 milliard funtdan ko‘proq pul taklif qilgandi. Biroq uning taklifi rad etilgan. O‘sha yili qatarliklar “PSJ”ning 70% aksiyasini sotib olgandi.

Qatarliklarga bu borada “Manchester Yunayted” muxlisi hisoblangan britaniyalik milliarder Jim Retkliff raqobat qiladi.