Агар дербини томоша қилган бўлсангиз, Варан жуда фаол ўйнагандек туюлди, тўғрими?

“Лидс”га қарши кечаги ўйинда “МЮ” марказий ҳимоячиси Рафаел Варан 104 маротаба узатма амалга оширган. Жамоанинг умумий пасларининг 1/5 қисми. Бу ушбу мавсумда жамоа ўлчовида рекорд ҳисобланади. “Юнайтед”нинг тўп назорати, умумий паслар сони мавсумдаги ўртача кўрсаткичидан у қадар ошиб кетмади, аммо аввалги ўйинларда, масалан, Вараннинг, умуман бу кўрсаткич бўйича энг яхшиларнинг жами паслари 65-70 ўртасида бўлган. Қарийб 1.5 баробар ўсиш.

Эътибор берсангиз, бошқа футболчиларнинг кўрсаткичи ўзгаришсиз қолган ҳам.
Бу ниманинг ҳисобига? Эриксеннинг йўқлиги, Каземиронинг дисквалификацияси учун “Лидс” жуда яхши тайёрланган. Жамоа фаол прессинг қилди ва изолация қурбони сифатида Варанни танлади. Франциялик ҳимоячи ҳужум бошлашда, ўткир ва узоқ масофага пасларда шериклари Мартинес, Шоу, Далотдан ортда қолади. “Лидс” рақибнинг бошқа футболчиларини персонал таъқиб қилди ва мажбуран ягона очиқ адресат Варан бўлиб қолаверди.

Бошқа бундай пайтларда Каземиро ёки Эриксен ҳимоячилар орасига тушиб, ёрдам берарди, аммо на Фред, на Забитцер бундай вазифа учун яхши номзод эмас. Очиқ футболда, юқори темпда ва рақиб дарвозасига хавф солишда Фред/Забитцер жуфтлиги Каземиро/Эриксендан устундир, буни кеча “МЮ” яратган вазиятлардан ҳам кўриш мумкин. Аммо тўпни назорат қилиш орқали ўйин темпини бошқаришда Эриксен, тўпсиз ҳолатда рақиб ҳужумлари учун хавфли зоналарни ёпишда Каземиро ўрни билинди.

Натижада, “Лидс” ҳужумда фаоллашган ва кўпчилик бўлиб олдинги ташланган пайтда Каземиросиз “МЮ” жуда қийналди (ҳар икки тайм бошлари, рақибнинг барча хавфли вазиятлари ва 2 гол), ҳамда билд-апда, ҳужумларни бошлашда Эриксенсиз “МЮ” юқорида айтилганидек, Варан ва тўп билан нима қилишини билмади.

Якшанба куни яна шу рақиблар Лидсда куч синашишади. Бу сафар қарши қурол сифатида тен Хаг нимани ўйлаб топиши қизиқ.

Қаҳрамон Асланов.