Янги мавсумга тайёргарлик доирасида Туркияда қишки ўқув-йиғин машғулотларини олиб бораётган "Нефтчи" жамоаси бугун навбатдаги назорат ўйинида Украина Примьер-лигаси вакили Луганскнинг "Заря" футбол клубига қарши майдонга чиқди.

Бу баҳсда юртдошларимиз ҳимоя чизиғини мустаҳкам ушлашга катта эътибор бердилар. Ҳужумчиларимиз ҳам ўзларига берилган кўрсатма ва топшириқларни моҳирона бажаришга ҳаракат қилдилар. Беллашувнинг 18-дақиқасида иқтидорли ҳужумчи Улуғбек Ҳошимов бурчакдан узатилган тўпни моҳирлик билан рақиблар дарвозасига киритиб, ҳисобни очишга эришди.

Шундан кейин украиналик футболчилар ҳисобни тенглаштириш ва олдинга чиқиб олиш учун босимни кучайтирдилар. Бироқ, "Нефтчи" бу босимни муносиб кутиб олиб, қарши ҳужумни авж олдиришга эътибор қаратди. Бундай басма-бас кураш учрашув охиригача қизғин давом этган бўлса ҳам, ҳисоб ўзгармади. Фарғоналик футболчилар ҳисобдаги кичик устунликни сақлаб қолиш учун барча имкониятларни ишга солдилар.

Шу тариқа, "Нефтчи" учрашувни ғалаба билан якунлаб, ўзига ва барча мухлисларга қувонч улашди.

Назорат ўйини
"Нефтчи" - "Заря" - 1:0
Анталия, Туркия. "Тренинг" стадиони
Гол: Улуғбек Ҳошимов,18 (1:0)
"Нефтчи":  Владимир Назаров, Нодир Неъматхонов (Зоир Жўрабоев 64), Алексей Ларин, Андрей Мишенко(Мухсин Убайдуллаев), Диёр Туропов, Мирзохид Ғофуров, Умар Адхамзода,Ғулом Ҳайдар Ғуломов, Нурилло Тўҳтасинов, Улуғбек Хошимов(Суннатилло Абдуллажонов 64), Тома Табатадзе (Мурод Бобожонов,64)
Бош мураббий: В.Г.Левченко
"Заря": Сапутин, Вантух, Снурницин, Имереков, Нагнойний, Хахльов, Мишньов, Булеца, Хлань, Антюх, Почапський.
Огоҳлантиришлар: У. Адҳамзода, 61.

"Нефтчи" ПФК матбуот хизмати