"Барселона" Испания Қироллик футбол федерацияси Техник ҳакамлар қўмитаси собиқ вице-президенти Хосе Мария Энрикес Негрейрага пул тўлаган, деб хабар бермоқда Marca нашри.
Манбага кўра, Каталония клуби Негрейрага тегишли бўлган DASNIL 95г компаниясига 1,4 миллион евро тўлаган. "Барселона" 2016-2018 йиллар оралиғида учта тўлов юборган. Ўшанда Энрикес Негрейра Испания Техник ҳакамлар қўмитаси вице-президенти эди.
Негрейра аллақачон кўрсатма бериб, нақд пул тўловлари консалтинг иши учун қилингани ва ҳакамлар "Барселона"га бошқа клублардан кўра ижобий муносабатда бўлмаганини айтди.
Қайд этилишича, Негрейра солиқ идорасига “Барселона”га консалтинг хизмати кўрсатганини тасдиқловчи ҳужжатларни тақдим этмаган. Мутахассис 2018 йилда Техник ҳакамлар қўмитаси вице-президенти лавозимини тарк этган.
“Барселона” 21 турдан кейин 56 очко билан Лига турнир жадвалида пешқадамлик қилмоқда.
