"Манчестер Сити" дарвозабони Эдерсон жамоанинг Чемпионлар лигаси жорий мавсумидаги режалари ҳақида гапирди. Эслатиб ўтамиз, "шаҳарликлар" тарихда ҳеч қачон бу турнирда ғалаба қозонишмаган. Сўнгги мавсум ярим финалида Хосеп Гвардиола шогирдлари сўнгги сонияларда финал йўлланмасини қўлдан бой берган бўлса, бир йил олдин Лондонда “Челси”га ҳал қилувчи баҳсда мағлуб бўлганди.
"Чемпионлар лигаси - бизнинг асосий мақсадимиз. Биз кубокни қўлга киритишга ҳаракат қиламиз. Биз ҳали бу турнирда ғалаба қозона олмадик, лекин ўйлайманки, бу йил бизда финалга чиқиш ва ғалаба қозониш учун имкониятлар кўп. Бизда ажойиб фазилатларга эга футболчилар гуруҳи бор”, - деди Эдерсон УЕФА расмий сайтига берган интервьюсида.
