"Арсенал" ўзининг расмий сайти орқали ярим ҳимоячи Моҳамед Эльнени билан шартнома узайтирилганини эълон қилди.
30 ёшли мисрлик футболчининг янги меҳнат шартномаси 2023/2024 йилги мавсум охиригача амал қилади.
Моҳамед Эльнени - "Арсенал" таркибидаги энг тажрибали футболчилардан бири. Агар ҳозирги ўйинчиларни оладиган бўлсак, мисрлик энг узоқ вақт - 2016 йилнинг январидан бери "канонирлар" сафида тўп суриб келмоқда. Ўшандан бери Эльнени "Арсенал" таркибида 155 та ўйинда майдонга тушиб, 6 та гол урди ва жамоадошлари учун 10 та голли узатмани амалга оширди.
“2016 йилдан буён бу ажойиб клуб вакили эканлигимдан фахрланаман. Ҳозир жамоамизда ҳукм сураётган руҳ ва бирдамлик шу қадар ижобийки, шартномани узайтирганимдан жуда хурсандман”, деди Эльнени.
