Наманган шаҳридаги "Паҳлавон" спорт мажмуасида "Навбаҳор" жамоасининг тақдимот маросимини ўтказди.
Маросимда Наманган вилояти ҳокими, вилоят футбол ассоциацияси президенти Шавкат Шокиржанович Абдураззоқов сўз олди.
Вилоятимиз раҳбари ўз сўзида ўтган мавсум вилоятимиз футболи учун самарали йил бўлганлиги, Ўзбекистон миллий терма жамоаси иштирокида тарихда илк марта Наманганда 2 та халқаро турнир бўлиб ўтганлиги, миллий терма жамоамиз ўша мусобақаларда зафар қучиб, жумладан, Осиё чемпионати йўлланмасини қўлга киритганлиги, Ўзбек футболининг 10 йиллик тантаналари вилоятимизда кенг миқёсда нишонланганлиги, "Навбаҳор"нинг асосий таркиби кумуш медални қўлга киритиб, ўз тарихида илк марта Осиё Чемпионлар лигасига йўл олганлиги, шунингдек, "Навбаҳор-фарм" Биринчи лигада зафар қучиб, Про лига йўлланмасини қўлга киритганлиги, бундан ташқари, "Навбаҳор"нинг U-19, U-16 ва U-13 жамоалари ҳам ўзи иштирок этган чемпионатларда чемпион бўлганлиги, муҳтарам Президентимиз Наманганга ташрифлари чоғида вилоятимиз футболини алоҳида эътироф этганликлари, шунингдек, вилоятимиз мухлислари борасида ҳам тўхталиб ўтганликларини айтиб, янги мавсумда жамоамизга омад ёр бўлишини тилади.
Ўтган мавсумда вице-чемпионлик унвонини қўлга киритган жамоамиз футболчилари, мураббийлар штаби ва клуб раҳбариятига кумуш медаллар топширилди.
Шундан сўнг жамоа бош мураббийи Самвел Бабаянга сўз берилди. Самвел Вячеславович ўз сўзида янги мавсумда шогирдлари билан ўтган йилдагидан кўра, яхшироқ натижага эришишини таъкидлаб ўтди.
Янги мавсумда "Навбаҳор" футболчилари кўк ва оқ футболкаларда майдонга тушишлари таъкидлаб ўтилди.
Жамоамиз футболчиларига янги мавсумда ўйнайдиган рақамлари ёзилган футболкалар топширилди. Унга кўра, янги мавсумда:
Ўткир Юсупов - 1, Хуршид Ходжаев -46, Озодбек Маърупов-41, Милош Милович-5, Иброҳим Йўлдошев - 6, Остон Ўрунов - 7, Жасур Яхшибоев - 8, Фаррух Икромов - 9, Жамшид Искандеров - 10, Шоҳруз Норхонов - 11, Жамшид Болтабоев - 14, Аброрбек Исмоилов - 17, Темурхўжа Абдухолиқов - 21, Игорь Голбан - 22, Йован Жокич - 23, Давронбек Ҳошимов - 24, Шаҳбоз Жўрабеков - 27, Лука Чермель - 31, Мамадалихон Олимов-33, Шерзодбек Абдулбориев - 34, Асадбек Собиржонов - 77 ва Давронбек Олимжонов - 98-рақамлар остида жамоа шарафини ҳимоя қилишадиган бўлди.
Жамоа сардори Ўткир Юсупов сўзга чиқиб, янги мавсумда мухлислар ишончини оқлаш, чемпионлик унвонини қўлга киритишга ҳаракат қилишларини таъкидлади.
