Бугун, 23 февраль куни Европа лигаси 1/16 финал жавоб ўйинида “Манчестер Юнайтед” ва “Барселона” ўзаро тўқнаш келади. Испаниядаги биринчи ўйинда дуранг қайд этилганди - 2:2. Жамоалар 1/8 финалга чиқиш учун курашмоқда, лекин кўпинча иккита суперклуб ўзаро ўйинларда жиддийроқ муаммоларни ҳал қилишганини кўрганмиз.
2009 ва 2011 йилги финаллар мухлислар хотирасида қолган, аммо энг қизиқарли ўйин 32 йил аввал бўлиб ўтган. Ўшанда жамоалар Кубок эгалари кубоги финалида тўқнаш келишди ва учрашувнинг бош қаҳрамони "Барса" томонидан рад этилган, аммо ватани "Манчестер Юнайтед"да қучоқ очиб кутиб олинган ҳужумчи бўлган эди.
1990/1991 йилги мавсумда УEФА кубогида инглиз жамоаларидан “Астон Вилла, Кубок эгалари кубогида эса “МЮ” ўйнади. Фергюсон 1990 йилда лигадаги натижалари туфайли истеъфога чиқарилишига яқин қолганди, аммо Англия кубоги финалида "Кристал Пэлас" устидан қозонилган ғалаба уни қутқариб қолди. Шотланд устидан босим пасайгач, у Европа кубоги учун юришни бошлади. Финал йўлида "Юнайтед" ҳеч қандай муаммоларга дуч келмади, улар нисбатан осон рақибларга эга бўлишди. Саккизта ўйинда “Манчестер Юнайтед” 15 та гол урди ва атиги 3 та гол ўтказиб юборди.
"Барса"нинг ҳал қилувчи ўйингача бўлган йўли анча қийин бўлди. "Кўк-анорранглилар" "Динамо Киев" (1/4) ва "Ювентус"(1/2) билан тўқнаш келди. Аммо Йохан Кройфф шогирдлари қаршиликларни синдира олди ва финалга чиқди. Испаниянинг янги чемпиони унвони ҳам "Барса"га ижобий ҳис-туйғуларни қўшди: улар "Реал Мадрид"дан ўтиб, беш йил ичида биринчи марта биринчи поғонага кўтарилишди.
Ҳужумчи Христо Стоичков жароҳат олганига қарамай, “Барселона” Нидерландиянинг Роттердам шаҳридаги “Де Куйп” стадионида бўлиб ўтадиган финалга деярли оптимал формада яқинлашди: Роналд Куман, Хулио Салинас ва Микаел Лаудруп майдонга тушиши мумкин эди. Аммо Фергюсоннинг биринчи афсонавий таркиби “Манчестер Юнайтед”да шакллана бошлаганди. “Қизил иблислар” финалга Стив Брюс, Гари Паллистер, Пол Инс, Браян Робсон, Ли Шарп ва Марк Хюз билан етиб келди.
"Манчестер Юнайтед" футболчиларидан бири - Марк Хюз учун "Барселона" билан учрашув ўзгача бўлди. Уэлслик форвард 1986 йилда Каталония клубида ёмон мавсумни бошдан кечирди. 1986/1987 йилги чемпионатда у 28 ўйин ўтказиб, бор-йўғи тўртта гол урди. Хюздан раҳбариятнинг ҳафсаласи пир бўлди, кейинги йили "Бавария"га ижарага беришди ва бир мавсумдан сўнг уни 1,8 миллион фунт эвазига "Юнайтед"га қайтаришга қарор қилишди. Шундай қилиб, ҳужумчи ҳал қилувчи ўйинда ниманидир исботлаши керак эди.
Финалнинг биринчи ярмида ҳисоб очилмади. Ўйин тенг курашларда ўтди. Ҳисоб 67-дақиқада очилди. Гол муаллифи Марк Хюз бўлди. Орадан 7 дақиқа ўтиб "Манчестер Юнайтед" ҳужумчиси дубл қайд этиб, "Барса" раҳбариятини ранжитди. Хюз испанлар дарвозабони Карлес Бускетсни (Серхионинг отаси) алдаб ўтди ва ўткир бурчакдан зарба бериб, ҳисобни 2:0 кўринишига келтирди.
"Барселона" учрашув натижасини ўзгартиришга ҳаракат қилди - Рональд Куман асосий қуролини ишга туширди: 79-дақиқада жарима зарбасидан гол урди. Аммо бу ўйинни қайтариш учун етарли бўлмади. “Юнайтед” 1968 йилдан бери илк бор Европа кубок эгалари кубогини қўлга киритди.
Испан газеталари “Манчестер Юнайтед” ўйинга фаришталардек оқ либосда келганини, бироқ кейин “Барселона”ни шайтондек билан мағлуб этганини таъкидлади. Фергюсон муҳим Европа кубогини қўлга киритди ва бу унинг "Манчестер Юнайтед" билан халқаро майдондаги биринчи жиддий титулига айланди. Шунда маълум бўлдики, шотландиялик "Юнайтед"га ҳақиқий буюклик келтира олади. “Қизил иблислар” бошлиқларининг сабри бесамар кетмади: Фергюсон жамоасига 13 марта АПЛ чемпионлиги, бешта Англия кубоги, тўртта Лига кубоги, икки марта Чемпионлар лигаси ва яна кўплаб совринларни олиб келди. Марк Хюз эса 1991 йилнинг май ойида "Барселона" нотўғри қарор қабул қилганлигини исботлади ва яна тўрт ажойиб йилни Манчестерда ўтказди.
