"Аталанта" ҳужумчиси Расмус Хойлунд "Реал" ва "Арсенал" скаутларининг эътиборини тортди, деб хабар беради La Republicca.
Нашрнинг ёзишича, испан клуби ҳужумчи Карим Бенземанинг ўрнига узоқ муддатга футболчи қидирмоқда. Англия жамоаси эса Габриэль Жезусга яхши ёрдамчи олиб келиш мақсадида ҳужум чизиғини кучайтиришни режалаштирган.
Даниялик футболчи 2022 йилнинг августидан буён “Аталанта” сафида тўп суради. Унинг жамоа билан амалдаги шартномаси 2027 йилнинг июнигача амал қилади.
20 ёшли ҳужумчи жорий мавсум Италия клуби сафида 21 та ўйинда майдонга тушиб, 7 та гол урди ва 2 та голли узатмани амалга оширди. Transfermarkt порталига кўра футболчининг нархи 15 миллион еврога баҳоланмоқда.