"Ньюкасл" футболчилари Лига кубогини қўлга киритишса, ҳар бири 1 миллион фунтдан бонус олади.
Daily Mail нашри хабарига кўра, финалда "Манчестер Юнайтед"га қарши ўйинда ғалаба қозониш учун бериладиган мукофот жамғармаси Англия Футбол Лигасининг (EFL) мукофот пулидан 10 баравар кўпдир, аммо "Ньюкасл"нинг саудиялик эгалари 48 йил ичида биринчи соврин учун футболчиларни хурсанд қилишмоқчи.
Бонуслар ўйинчилар ўртасида ушбу мавсумда ўйнаган ўйинлар ва дақиқаларни ўз ичига олган мураккаб формула бўйича тақсимланади. Бош мураббий Эдди Хау ҳам шартномасида ёзилган бонусни олади.
Қайд этилишича, бонус миқдори ўтган ёзда “Ньюкасл” раҳбарияти ва футболчилар ўртасида бўлиб ўтган музокаралар чоғида келишилган эди.
Англия Лига кубоги доирасидаги "Ньюкасл" ва "Манчестер Юнайтед" ўртасидаги учрашув 26 февраль якшанба куни бўлиб ўтади.
