Туркиянинг Истанбул шаҳрида давом этаётган Бутунжаҳон шахмат олимпиадасида бир кунлик танаффусдан кейин 6-тур ўйинлари ўтказилди. Қувонларли томони, бу турда Ўзбекистон эркаклар ва аёллар терма жамоалари ғалаба қозонишди.

Эркаклар терма жамоамиз бу турда рейтинг жиҳатдан ўзлари билан тенг кучли бўлган бразилияликларни 3,5-0,5 ҳисобида енгишди. Рустам Қосимжонов ўз партиясида дуранг ўйнаган бўлса, қолган 3 нафар ақл идрок соҳиблари ғалаба нашидасини суришди.
Ўзбекистон - Бразилия - 3,5-0,5
Рустам Қосимжонов - Рафаэль Лейтао 0,5-0,5
Антон Филиппов - Жованни Вескови  1-0
Марат Жумаев - Жильберто Милос 1-0
Андрей Квон - Крикор Мехитарян 1-0

Ушбу йирик ҳисобдаги ғалабадан кейин эркаклар терма жамоамиз 20-ўринга кўтарилиб олди. Юқори ўринларни эса Россия, Арманистон ва Озарбойжон шахматчилари эгаллаб туришибди.

Швейцария тизимда ўтказилаётган мусобақада бугун 7-тур ўйинлари бўлиб ўтади. Ўзбекистон эркаклар терма жамоаси Мексикага қарши баҳс олиб боради. Мексика мусобақада 38-рейтинг кўрсаткичга эга бўлиб, 6-турдан кейин 15-ўринни эгаллаб турибди.