Ўзбекистон ёшлар терма жамоаси бош мураббийи Равшан Ҳайдаров Сурияга қарши учрашувдан сўнг журналистларнинг саволларига жавоб бериб ўтди.

Бугунги учрашув ҳақида:
— Авваламбор, барчани футбол байрами бошлангани билан табриклайман. Стадионга келиб, бизни қўллаб-қувватлаган барча мухлисларга миннатдорчилигимни билдираман. Бугунги учрашувга келсак, ўйин қийин кечди. Биз буни кутгандик ва бунга тайёрлангандик. Эндиликда шу руҳда ишлашда давом этишимиз керак.

Учрашувдаги босим:
— Биласиз, биринчи ўйинлар ҳар доим қийин кечган. Бундан ташқари, ёшларимиз аста-секинлик билан бундай босимга кўникиб бормоқдалар. Бу ёшда босим бўлиши табиий. Кўплаб мухлислар қаршисида ўйнашнинг ҳам ўзига яраша қийинчиликлари бўлади.

Ўйин давомида кўплаб вазиятларимиз бўлди, стандартлар ҳам кўп бўлди. Бироқ уларни якунлашда бироз қийинчиликка дуч келдик. Эндиликда босқичма-босқич ўйинимизни янада яхшилаш устида ишлаб борамиз.

Рақиб ҳақида:
— Рақибларимиз ҳам бугун ажойиб ўйин кўрсатдилар. Улар якка курашларда ишончли ўйнадилар.

Аббос Файзуллаев ҳақида:
— Аббос биз учун муҳим футболчиларимиздан. У қандай ўйнаш кераклигини ва вазиятлардан фойдаланишни яхши билади. Бугун ҳам жамоамизнинг муҳим голига муаллифлик қилди. Алмаштиришга келсак, ўйин охирига келиб, биз уни алмаштиришга қарор қилдик. Бу шунчаки бироз чарчоқ билан боғлиқ, ҳеч қандай жароҳатлар йўқ. У ҳозирда ўзини яхши ҳис қилмоқда.

Ироқ билан бўладиган кейинги ўйин ҳақида:
— Учрашувимизни таҳлил қиламиз ва кейинги ўйинга тайёргарликни бугунданоқ бошлаймиз.