Лондон Олимпиадасида мамлакатимиз ҳисобига ягона олтин медални келтирган Артур Таймазовни "Пахтакор" ФК табриклади.
Олимпиадаларда Ўзбекистон терма жамоасига жами 3та олтин ва битта кумуш медални келтирган Таймазов мустақиллик йилларида юртимиз довруғини жаҳонга таратган энг машҳур спортчилардан бири ҳисобланади. Лондонда у барчамизни қувонтирган ҳолда учинчи бор Олимпиадада тенгсиз курашчига айланди. Ўтган куни "Пахтакор" ФК вице-президенти Самвел Бабаян Артурни қўлга киритилган ютуқ билан табриклаб, унга жамоамизнинг учинчи рақамли футболкаси (Олимпиададаги 3та олтин медални ифодалаган), жамоа шарфи ҳамда клуб рамзи туширилган махсус лаганни тақдим этди.
Самвел Вячеславович қуйидаги фикрларни билдириб ўтди:
— Ватан учун хизмат қилиш, унинг муваффақиятларига ҳисса қўшиш Ўзбекистон фуқароси ҳисобланган ҳар бир инсоннинг бурчидир. Агар барчамиз Ватан олдидаги бурчимизни англаб етсак, онгли равишда унинг тараққиёти учун хизмат қилишимиз шарт. "Пахтакор" клуби номидан Артур Таймазовга унинг юртимиз довруғини дунёга ёйишда қилган хизматлари олдида таъзим қиламан.
Биз клуб номидан Таймазовга бундан кейинги халқаро мусобақаларда ҳам Ўзбекистон шарафини муносиб ҳимоя қилишда давом этишини тилаб қоламиз.
