Учрашув якунлангач ҳар бир мураббий ёки футболчида у ким бўлишидан қатъи назар ўйин ҳақида субъектив фикрини билдириш ҳуқуқи мавжуд. Яъни, хоҳ ҳакамнинг адолатсиз қарорлари, хоҳ майдоннинг салбий сифати ёки бўлмаса ташкилий масалалар ҳақида гап кетар экан ҳақоратомуз оҳангда айтилмаса бўлгани. Фикр билдириш мураббийнинг ўша касб доирасидан келиб чиқиб шахсий имконияти аслида.

Халқаро турнирларда риоя қилинувчи барча учун умумий мазмундаги қонун-қоидаларни ҳар бир мамлакат ўзидаги мавжуд баланс ҳамда тизгиндан келиб чиқиб ўзгартириши ҳам мумкин. Бу нормал ҳолат. Биздаги футбол қатламининг аксар қисмида ҳакамлар ва футбол расмийларига нисбатан ўта ҳам салбий мафкура ҳукмрон. Ички чемпионат баҳсларида мураббийларнинг реферилар бўйича эътирозлари агар асосли бўлса, ёзма баёнот шаклида кўриб чиқилади, унда ҳам бу нарсаларга ОАВ ҳамда мухлислар олдида жар солинавермайди. Бизда футбол расмийларининг обрўсизлантирилишига йўл қўйилмайди ва бу жуда ҳам яхши.

Тожикистон мураббийининг интервьюсига келадиган бўлсак, у ўз ҳуқуқидан фойдаланди холос. Нейтрал кўз билан қаралса, унинг ҳам гапларида жон бор. «Ўзининг сунъий майдонларидан хабар олсин, машҳур анжуманларда ҳам сув қўйилмаганку» қабилида фикрлаш анча бачака ҳамда баҳона холос.

Қўшниларимиз билан бўладиган доимий рақобат ҳамда турли тортишувлар ўз йўлига, умуман бошқа масала. Ҳақиқий футболни севувчи мамлакатга майда гаплар ярашмайди ва улар жуда ҳам кичик деталларгача эътиборли бўлади. Акс ҳолда камчиликларимиз дарвоза тўрларимиздаги тирқишдан каттароқ оқимда сизиб чиқаверади. Фикрларнинг ноўрин инқилоби зараримизга ишлаши тайин.

Мусобақа ёмон ўтмаяпти. Яхши кайфиятда тугайди ҳам албатта.

Юсуфбек Сайдалиев