Uchrashuv yakunlangach har bir murabbiy yoki futbolchida u kim bo‘lishidan qat’i nazar o‘yin haqida sub’ektiv fikrini bildirish huquqi mavjud. Ya’ni, xoh hakamning adolatsiz qarorlari, xoh maydonning salbiy sifati yoki bo‘lmasa tashkiliy masalalar haqida gap ketar ekan haqoratomuz ohangda aytilmasa bo‘lgani. Fikr bildirish murabbiyning o‘sha kasb doirasidan kelib chiqib shaxsiy imkoniyati aslida.

Xalqaro turnirlarda rioya qilinuvchi barcha uchun umumiy mazmundagi qonun-qoidalarni har bir mamlakat o‘zidagi mavjud balans hamda tizgindan kelib chiqib o‘zgartirishi ham mumkin. Bu normal holat. Bizdagi futbol qatlamining aksar qismida hakamlar va futbol rasmiylariga nisbatan o‘ta ham salbiy mafkura hukmron. Ichki chempionat bahslarida murabbiylarning referilar bo‘yicha e’tirozlari agar asosli bo‘lsa, yozma bayonot shaklida ko‘rib chiqiladi, unda ham bu narsalarga OAV hamda muxlislar oldida jar solinavermaydi. Bizda futbol rasmiylarining obro‘sizlantirilishiga yo‘l qo‘yilmaydi va bu juda ham yaxshi.

Tojikiston murabbiyining intervyusiga keladigan bo‘lsak, u o‘z huquqidan foydalandi xolos. Neytral ko‘z bilan qaralsa, uning ham gaplarida jon bor. «O‘zining sun’iy maydonlaridan xabar olsin, mashhur anjumanlarda ham suv qo‘yilmaganku» qabilida fikrlash ancha bachaka hamda bahona xolos.

Qo‘shnilarimiz bilan bo‘ladigan doimiy raqobat hamda turli tortishuvlar o‘z yo‘liga, umuman boshqa masala. Haqiqiy futbolni sevuvchi mamlakatga mayda gaplar yarashmaydi va ular juda ham kichik detallargacha e’tiborli bo‘ladi. Aks holda kamchiliklarimiz darvoza to‘rlarimizdagi tirqishdan kattaroq oqimda sizib chiqaveradi. Fikrlarning noo‘rin inqilobi zararimizga ishlashi tayin.

Musobaqa yomon o‘tmayapti. Yaxshi kayfiyatda tugaydi ham albatta.

Yusufbek Saydaliyev