«Ньюэллс Олд Бойз» бош мураббийи Габриэль Хайнце «ПСЖ» ҳужумчиси Лионель Мессининг жамоага қайтиши мумкинлиги ҳақидаги миш-мишларга изоҳ берди.

«У ҳақидаги саволлардан уяламан. У қайтиш ёки қайтмасликни фақат ўзи ҳал қилади. Бу унинг танлови, ҳеч ким қайтишга мажбур эмас.

Илтимос, Мессини тинч қўйинг, у бизни хурсанд қилишда давом этсин ва қаерда бўлмасин бахтли бўлсин», - деди Хайнце.

Мессининг «ПСЖ» билан амалдаги шартномаси 2023 йилнинг ёзига қадар амал қилади. Шунингдек, ОАВ у парижликларнинг шартнома бўйича молиявий жиҳатларидан қониқмагани ҳақида хабар берган эди.

Олдинроқ Мессининг отаси «Барселона» президенти Жоан Лапорта билан музокара ўтказгани, унда аргентиналик футболчининг Каталония клубига қайтиши масаласи муҳокама қилингани ҳақида хабар берилганди.

35 ёшли аргентиналик футболчи жорий мавсумда «ПСЖ» сафида 29 та ўйинда майдонга тушиб, 18 та гол урди ва 16 та голли узатмани амалга оширди.